მოკლედ: ტელეკომპანია ფორმულაზე გასართობი გადაცემების გარდა, ბიზნესის რედაქციაც დაიხურება.

  • არხზე აღარ გავა გადაცემა ბიზნეს ფორმულა,
  • ასევე, ფუნქციონირებას შეწყვეტს ვებგვერდი businessformula.ge.

დეტალები: ბიზნესის რედაქციის ვებრედაქტორი, მარიამ ტიტვინიძე ამბობს, რომ გადაცემისა და ვებგვერდის დახურვის მიზეზი ფორმულაში გამოცხადებული რეორგანიზაციაა.

  • "businessformula.ge მომავალი ერთი თვე გააგრძელებს მუშაობას, შემდეგ კი ამ პლატფორმიდან ოფიციალურად დამშვიდობება მომიწევს, რაზეც უზომოდ მწყდება გული", — წერს მარიამ ტიტვინიძე.
  • დამატებით, ტიტვინიძემ On.ge-ს უთხრა, რომ ბიზნეს რედაქცია, ტექნიკური პერსონალის ჩათვლით, 20-მდე ადამიანს აერთიანებს.

რა ხდება ტელეკომპანია ფორმულაში: ტელეკომპანია ფორმულაში რეორგანიზაციაა — არხზე იხურება გასართობი გადაცემები. ამის შესახებ ტელეკომპანია ფორმულამ გუშინ, 31 იანვარს განაცხადა. განცხადებაში საუბარი იყო მხოლოდ გასართობი გადაცემების დახურვაზე.

განცხადებაში არ იყო აღნიშნული კონკრეტულად რომელი გასართობი გადაცემები დაიხურებოდა, თუმცა,

  • სოციალურ ქსელში ია ფარულავამ და თათია შარანგიამ დაწერეს, რომ მათი გადაცემები — მოდი, ვილაპარაკოთ ია ფარულავასთან და სთორი იხურება.
  • კომპანიის განცხადებაში ნათქვამია, რომ თებერვლის და მარტის განმავლობაში შეიცვლება ფორმატი და მთლიანად გახდება საინფორმაციო-ანალიტიკური შინაარსის.

რა ვიცით რეორგანიზაციის მიზეზებზე: ფორმულას განმარტებით, აქ ფინანსური საკითხიც არის.

  • არხმა გასულ წელს ვერ შეძლო დაგეგმილი თანხების მობილიზება.
  • "პოლიტიკურ კონიუნქტურასთან ერთად პროცესზე იმოქმედა ქვეყანაში მოქმედმა იმ რეგულაციებმა, რომელთა მთავარი ამოცანაც კრიტიკული მედიისთვის დაფინანსების წყაროების შემცირება იყო. ამ მიზეზების გამო ოპტიმიზაცია მოუხდა საქართველოში მოქმედ ყველა კრიტიკულ მაუწყებელს და ახლა გვიწევს ჩვენც", — წერია მათ განცხადებაში.
  • ამის გამო კი, საარჩევნო წლის კონტექსტის გათვალისწინებით, მიიღეს გადაწყვეტილება, არჩევანი საზოგადოებრივ-პოლიტიკურ კონტენტზე გაეკეთებინათ.