მოკლედ: ტელეკომპანია ფორმულაში რეორგანიზაციაა — არხზე იხურება გასართობი გადაცემები.

  • კომპანიის განცხადებაში ნათქვამია, რომ თებერვლის და მარტის განმავლობაში შეიცვლება ფორმატი და მთლიანად გახდება საინფორმაციო-ანალიტიკური შინაარსის.

რა ვიცით რეორგანიზაციის მიზეზებზე: ფორმულას განმარტებით, აქ ფინანსური საკითხიც არის.

  • არხმა გასულ წელს ვერ შეძლო დაგეგმილი თანხების მობილიზება.
  • "პოლიტიკურ კონიუნქტურასთან ერთად პროცესზე იმოქმედა ქვეყანაში მოქმედმა იმ რეგულაციებმა, რომელთა მთავარი ამოცანაც კრიტიკული მედიისთვის დაფინანსების წყაროების შემცირება იყო. ამ მიზეზების გამო ოპტიმიზაცია მოუხდა საქართველოში მოქმედ ყველა კრიტიკულ მაუწყებელს და ახლა გვიწევს ჩვენც", — წერია მათ განცხადებაში.
  • ამის გამო კი, საარჩევნო წლის კონტექსტის გათვალისწინებით, მიიღეს გადაწყვეტილება, არჩევანი საზოგადოებრივ-პოლიტიკურ კონტენტზე გაეკეთებინათ.

რომელი გადაცემები იხურება: განცხადებაში კონკრეტულ გადაცემებზე საუბარი არ არის.

თუმცა, სოციალურ ქსელში ია ფარულავამ და თათია შარანგიამ დაწერეს, რომ მათი გადაცემები — მოდი, ვილაპარაკოთ ია ფარულავასთან და სთორი იხურება.

"გვიწევს რეორგანიზაცია; არხის გასართობი სეგმენტის შეზღუდვა და საშტატო ოპტიმიზაცია; შედეგად, საკადრო რესურსის შემცირება და სამწუხაროდ, ჩვენი გუნდის ძალიან მნიშვნელოვან ნაწილთან დამშვიდობება", — წერია ფორმულას მიერ გავრცელებულ განცხადებაში.