მოკლედ: "არავინ არ შეიცვლება", — ასე უპასუხა სამთავრობო ცვლილებებთან დაკავშირებით მედიის შეკითხვას ქართული ოცნების პრემიერ-მინისტრობის კანდიდატმა, ირაკლი კობახიძემ.

  • კობახიძე სპეკულაციას უწოდებს გავრცელებულ ცნობებს მინისტრთა კაბინეტის ცვლილებაზე და ამბობს, რომ არ არსებობს ღარიბაშვილისა და კობახიძის გუნდები, არსებობს მხოლოდ ქართული ოცნების გუნდი.
  • "აქ არსებობს მხოლოდ ერთ გუნდი, ქართული ოცნების პოლიტიკური გუნდი. სამომავლოდაც ასე იქნება, არა კობახიძის გუნდი, არამედ — ქართული ოცნების გუნდი", — თქვა მან.

დეტალები: კობახიძის თქმით, მან ყველა არსებულ მინისტრს შესთავაზა თანამდებობაზე დარჩენა.

  • თუმცა, ერთადერთი, საკუთარი მოსაზრებიდან გამომდინარე, თავდაცვის მინისტრს სურდა სხვა სფეროში გადანაცვლება, "რასაც, რა თქმა უნდა, ანგარიში გავუწიეთ".

ვინ შეცვლის თავდაცვის მინისტრს: პრემიერ-მინისტრობის კანდიდატის თქმით, თავდაცვის სამინისტროს ჯუანშერ ბურჭულაძის ნაცვლად, ირაკლი ჩიქოვანი უხელმძღვანელებს.

  • ირაკლი ჩიქოვანი პარლამენტის ვიცე-სპიკერია 2023 წლის 16 ნოემბრიდან.

პროცედურულად: მას შემდეგ, რაც მოქმედმა პრემიერ-მინისტრმა, ირაკლი ღარიბაშვილმა გადადგომის თაობაზე განაცხადა, კანონის მიხედვით, უფლებამოსილება შეჩერდა მინისტრთა კაბინეტის სრულ შემადგენლობას და ახლა ისინი მოვალეობის შემსრულებლები არიან.

  • სამთავრობო იმედის მიხედვით, პრემიერ-მინისტრობის ახალი კანდიდატი, ირაკლი კობახიძე სამთავრობო პროგრამას საქართველოს პარლამენტს ხვალ, 2 თებერვალს წარუდგენს.
  • კობახიძე ასევე წარადგენს პარლამენტში მინისტრთა კაბინეტის განახლებულ შემადგენლობას.
  • იმედი აცხადებს, რომ მოსალოდნელია, შეიცვალოს რამდენიმე მინისტრი.
  • საქართველოს პარლამენტს ხვალიდან, 2 თებერვლიდან ექნება მომდევნო 2 კვირა იმისთვის, რომ ნდობა გამოუცხადოს პრემიერ-მინისტრობის ახალ კანდიდატსა და მინისტრთა კაბინეტს.

კონტექსტი: მოქმედმა პრემიერ-მინისტრმა, ირაკლი ღარიბაშვილმა მოულოდნელად დატოვა პრემიერ-მინისტრობის პოსტი 29 იანვარს, დღის ხუთ საათზე.

  • მის განცხადებას წინ უძღოდა სახელისუფლებო ტელეარხის, იმედის მიერ, იმავე დღის დილით გავრცელებული ექსკლუზიური ინფორმაცია, რომლის მიხედვით, ოცნების პოლიტსაბჭოს გადაწყვეტილებით, ღარიბაშვილს პრემიერად კობახიძე შეცვლის, კობახიძეს კი ღარიბაშვილი ჩაანაცვლებს პარტიის თავმჯდომარედ.
  • ღარიბაშვილი მეორე ვადით პრემიერ-მინისტრად 2021 წელს დანიშნა ოცნების პოლიტსაბჭომ მას შემდეგ, რაც პრემიერობიდან გიორგი გახარია გადადგა.
  • მანამდე, ღარიბაშვილი ამ პოზიციას 2013-დან 2015 წლის დეკემბრამდე იკავებდა.

გაიგე მეტი: რა იყო ღარიბაშვილის პრემიერობის ბოლო სიტყვა