ახალდასხმულ ასფალტზე დატოვებული კვალი — ხშირად ცუგების ან ფისოების თათების ანაბეჭდები — ალბათ ყველას გვინახავს. მსგავსს შეხვდებით აშშ-ის ქალაქ ჩიკაგოში, უესტ-როსკოს ქუჩის ტროტუარზე. აქ მღრღნელს მთელი სხეულით დაუტოვებია კვალი, რომელსაც ადგილობრივებმა ჩიკაგოს ვირთხის ღრმული შეარქვეს. ეს ღრმული კი, რაც უნდა სასაცილოდ ჟღერდეს, 2024 წლის დასაწყისში ქალაქის ღირსშესანიშნაობად იქცა.

7 იანვარს ჩიკაგოელმა კომიკოსმა უინსლოუ დამეინმა X-ზე (ყოფილ ტვიტერზე) ღრმულის ფოტო გამოაქვეყნა და იხუმრა, ეს ადგილი აუცილებლად უნდა მომელოცაო. პოსტი ვირუსულად გავრცელდა — ის 5 მილიონზე მეტმა ადამიანმა ნახა და ჩიკაგოელები ქალაქის სხვადასხვა უბნიდან უესტ-როსკოს ქუჩაზე საგანგებოდ მივიდნენ ღრმულის სანახავად. ბევრმა იქ მონეტები, ყვავილები, სანთლები, ყველი, სათამაშოები და ალკოჰოლური სასმელიც კი მიიტანა. სულ მალე იქ მემორიალური დაფაც გაჩნდა და ადგილს ოფიციალურად დაერქვა ჩიკაგოს ვირთხის ღრმული.

"ბევრი წლის წინ, ზუსტად ამ ადგილას, წარუშლელი კვალი დატოვეს. ზოგისთვის ეს უბრალოდ ღრმულია, დანარჩენებისთვის კი ის ჩვენს სახლად ქცეულ ბეტონის ჯუნგლებში ცხოვრების მეტაფორაა", — ვკითხულობთ მემორიალურ დაფაზე.

საინტერესო ამბავი ის გახლავთ, რომ ღრმული ტროტუარზე, სულ ცოტა, 20 ან 30 წელია, რაც არსებობს (ადგილობრივების თქმით), მაგრამ საყოველთაო ყურადღება მხოლოდ დამეინის პოსტის შემდეგ მიიქცია. თანაც ისეთი ყურადღება, რომ მის შესახებ ვიკიპედიაში გვერდიც კი გაჩნდა და გავლენიანი მედიები ჩიკაგოს უცნაურ ახალ ღირსშესანიშნაობაზე ალაპარაკდნენ.

"ეს ჩიკაგოს სტოუნჰენჯია", — წერს The New York Times, — "დანამდვილებით არავინ იცის, როგორ გაჩნდა, მაგრამ ხალხს აქ მოსვლა და მის გარშემო შემოკრება უყვარს".

///

"ჩიკაგოს სტოუნჰენჯს" წარუშლელი კვალი კი უწოდეს მემორიალურ დაფაზე, მაგრამ მალევე, 19 იანვარს, დაუდგენელმა პირმა "ვანდალური ქმედება" ჩაიდინა — ღრმული ამოავსო. ამბის გაგებიდან მალევე, ადგილობრივებმა საკუთარი სახსრებით ცადეს მისი ამოსუფთავება. ჩიკაგოელები რომ არ განერისხებინა, ქალაქის მერიამ დააზუსტა, ჩვენ არ ამოგვივსიაო. საბოლოოდ, ღრმულს ერთმა ქალმა დაუბრუნა პირვანდელი მდგომარეობა. და აი, ჩიკაგოს ვირთხის ღრმული ისევ იქცა ტურისტულ ადგილად. მეტიც, ცოტა ხნის წინ აქ ქორწინების ცერემონიაც კი შედგა.

ტურისტების გარდა, ღრმულმა ადგილობრივი პოლიტიკოსების ყურადღებაც მიიქცია. განსაკუთრებული აქტიურობით გამოირჩეოდა ილინოისის მე-11 რაიონის წარმომადგენელი ენ უილიამსი, რომელმაც ადგილს "რაიონის საგანძური" უწოდა. მისი ამოვსების შემდეგ, პოლიტიკოსმა განაცხადა, რომ ამბით "შოკირებული" იყო და "მოვლენების განვითარებას თვალყურს ადევნებდა".

სხვათა შორის, ჩიკაგოს ვირთხის ღრმულისთვის უფრო მოსახერხებელი სახელის შესარჩევად კონკურსიც გამოცხადდა. საბოლოოდ, ადგილობრივების ხმის მიცემის შედეგად, გამოვლინდა გამარჯვებული — "ტყაპანტუი" (მინიშნება Pixar-ის ცნობილ ფილმზე რატატუი, რომლის მთავარი გმირი ვირთხაა).

უინსლოუ დამეინი კი, რომელმაც მთელი ეს უცნაური ამბავი წამოიწყო, ამბობს, რომ ტყაპანტუი, უბრალოდ, ბევრი ადამიანის ჩართულობით შექმნილი ხუმრობაა.

"საბოლოო ჯამში, ვირთხის ღრმული, რა თქმა უნდა, სულელური რაღაცაა, მაგრამ ადგილი ასეთი პოპულარული იმიტომ გახდა, რომ ამ დიდ, საყვარელ ხუმრობას ათასობით ადამიანი აჰყვა".