მოკლედ: კახეთში, 14 წლის გოგოს გაუპატიურების ფაქტის შესახებ On.ge-ს შინაგან საქმეთა სამინისტროში დაუდასტურეს.

  • უწყების ცნობით, ბრალდებული იდენტიფიცირებულია.

დეტალები: 14 წლის გოგოს გაუპატიურებაში ბრალდებულის წინააღმდეგ, საქმე აღიძრა სისხლის სამართლის კოდექსის 137-ე მუხლით, რაც გულისხმობს გაუპატიურებას — სქესობრივ კავშირს ძალადობით, ძალადობის მუქარით, ან დაზარალებულის უმწეობის გამოყენებით.

  • დანაშაული ისჯება თავისუფლების აღკვეთით ექვსიდან რვა წლამდე.
  • გაუპატიურების ფაქტზე ბრალდებული ამჟამად საავადმყოფოში იმყოფება, რადგან დაჭრეს.
  • მედიაში გავრცელებული ცნობის მიხედვით, მას ჭრილობები 14 წლის გოგოს ახლობელმა მიაყენა.
  • შსს-ში გვითხრეს, რომ დაჭრის ფაქტზე, ცხელ კვალზე დააკავეს ერთი პირი.
  • მის წინააღდეგ საქმე აღიძრა 117-3 მუხლით, რაც ჯანმრთელობის განზრახ მძიმე დაზიანებას გულისხმობს და ისჯება თავისუფლების აღკვეთით სამიდან ექვს წლამდე.

საჭირო ინფორმაცია: თუ მოულოდნელად ძალადობრივ სიტუაციაში აღმოჩნდი, გადმოწერილი გქონდეს მობილური აპლიკაცია Safe You. მისი მეშვეობით, შენ ერთი ღილაკის დაჭერით შეძლებ დახმარება სთხოვო მეგობრებს, პოლიციას, არასამთავრობო ორგანიზაციების იურისტებს. გადმოიწერე აპლიკაცია და იყავი დაცული.

პოლიციის გამოძახება შესაძლებელია 112-ზე დარეკვით. ზარი უფასოა. შესაძლებელია 112-ის აპლიკაციის გადმოწერაც, სადაც ღილაკზე SOS დაჭერით პოლიციასთან შეტყობინება შევა და სამართალდამცველები ლოკაციის მიხედვით გიპოვიან.