მოკლედ: საქართველო იმ ქვეყნებს შორის ლიდერობს, სადაც გასულ, 2023 წელს, რუსეთის მოქალაქეებმა ბიზნესი გახსნეს — იუწყება Forbes-ის რუსულენოვანი რედაქცია. გამოცემა ეყრდნობა ანალიტიკური პორტალის, Finion-ის მონაცემებსა და ცნობებს.

დეტალები: 2023 წლის იანვარ-დეკემბრის პერიოდში, საქართველოში რუსეთის 13 ათასი მოქალაქე დარეგისტრირდა იურიდიულ პირად.

  • მანამდე, 2022 წლის თებერვლიდან — 2023 წლის თებერვლამდე, საქართველოში რუსეთის მოქალაქეებიდან, 16 000-მდე ინდმეწარმე იყო რეგისტრირებული.
  • შედარებისთვის, 1995 წლის იანვრიდან 2022 წლის თებერვლამდე, რუსეთის მოქალაქეებს საქართველოში მხოლოდ 7 788 კომპანია ჰქონდათ დააარსებული.

რა მიზეზებია: ვიაჩესლავ კარტამიშევი, კომპანია Finion-ის დირექტორი მიიჩნევს, რომ საქართველოში რუსეთის მოქალაქეთა მიერ კომპანიების ასეთ მასიურ გახსნას რამდენიმე მიზეზი აქვს:

  • "წმინდა სტატისტიკური მიზეზების გარდა, რაც განპირობებულია რუსეთის მოქალაქეების საქართველოში მასობრივი შესვლით, ხელს უწყობს ბიზნესის დარეგისტრირების ხელსაყრელი პირობები და საგადასახადო სისტემა საქართველოში", — ამბობს ის.
  • მისივე თქმით, კიდევ ერთი უპირატესობა ის არის, რომ ინდმეწარმეს შეუძლია გადაიხადოს მხოლოდ 1%-იანი საშემოსავლო გადასახადი,
  • ხოლო შპს-ს მფლობელს შეუძლია, არ დარეგისტრირდეს დღგ-ს გადამხდელად, სანამ არ მიაღწევს ბრუნვას 100 000 ლარის ოდენობით, რაც, დაახლოებით 3,32 მილიონი რუბლია.
  • გარდა ამისა, საქართველოში რუსებს და ბელორუსებს შეუძლიათ ლეგალურად გახსნან საბანკო ანგარიშები, მათ შორის, ბიზნეს-საქმიანობისთვის.

ბოლო ხაზი: იმ ქვეყნებს შორის, სადაც რუსეთის მოქალაქეები არეგისტრირებენ ბიზნესს, მეორე ადგილზეა ყაზახეთი, — იქ, რუსებმა, 2023 წელს 6 100 კომპანია დააფუძნეს. ჩამონათვალში მესამე ადგილს სომხეთი და მონტენეგრო ინაწილებენ, სადაც რუსეთის მოქალაქეთა მფლობელობით 3 400 იურიდიული პირია რეგისტრირებული.