რა ხდება: პაკისტანმა ირანის სარაკეტო დარტყმის შემდეგ, ირანის ტერიტორიაზე შეტევა თავადაც განახორციელა, შედეგად კი 9 ადამიანი დაიღუპა.

• ირანმა პაკისტანის ტერიტორია 16 იანვარს დაბომბა, მათი თქმით, სამიზნე სამხედრო დაჯგუფების ჯაიშ ალ-ადლის ობიექტები იყო.

დეტალები: პაკისტანმა განაცხადა, რომ მათ "ტერორისტების თავშესაფარს" დაარტყეს, ირანის სამხრეთ-აღმოსავლეთით მდებარე სიტან-ბალოჩისტანის პროვინციაში.

• ირანის სამთავრობო მედიის ინფორმაციით, თავდასხმას 3 ქალი, 2 კაცი და 4 ბავშვი ემსხვერპლა.

კონტექსტი: საპასუხო ავიადარტყმები ხდება ახლო აღმოსავლეთში მზარდი დაძაბულობის ფონზე.

• ისრაელი ღაზაში ებრძვის პალესტინურ ჰამასს.
• ცეცხლს ხშირად უხსნიან ერთმანეთს ისრაელი და ლიბანური ჰეზბოლა.
• ირანის მიერ მხარდაჭერილი ჯგუფები ერაყსა და სირიაში ამერიკის შეიარაღებული ძალების ობიექტებს ესხმიან თავს, დასავლეთის ქვეყნები ცდილობენ, ასევე ირანის მიერ მხარდაჭერილი იემენელი ჰუსიტების თავდასხმები მოიგერიონ წითელ ზღვაში, კომერციულ გემებზე.

არის თუ არა ესკალაციის საფრთხე: პაკისტანი და ირანი დიდი ხანია ადანაშაულებენ ერთმანეთს სამხედრო დაჯგუუფებებისთვის თავშესაფრის მიცემაში.

• ეს დაჯგუფებები თავდასხმებს ახორციელებენ მათი საერთო საზღვრის გასწვრივ მდებარე დასახლებებზე.

დღეს, 18 იანვარს პაკისტანის საგარეო საქმეთა სამინისტრომ დაადასტურა ირანის მიერ გავრცელებული ინფორმაცია, რომ პაკისტანმა დარტყმა ქალაქ სარავანზე მიიტანა.

• პაკისტანმა განაცხადა, რომ მოკლეს რამდენიმე "ტერორისტი".
• ქვეყნის ოფიციალური პირები ამბობენ, რომ პაკისტანი პატივს სცემს ირანის სუვერენიტეტსა და ტერიტორიულ მთლიანობას, მაგრამ მისი ქმედება ხუთშაბათს გამოხატავდა "პაკისტანის ურყევ გადაწყვეტილებას, დაიცვას ეროვნული უსაფრთხოება".
• პაკისტანმა სასტიკად დაგმო ირანის თავდასხმა ბალოჩისტანის პროვინციაში, რომელსაც, ისლამაბადის ინფორმაციით, 2 ბავშვი იმსხვერპლა.
• ირანი დაჟინებით ამტკიცებდა, რომ მისი დარტყმები მხოლოდ ჯაიშ ალ-ადლზე იყო მიმართული, ეთნიკურად ბალოჩ, სუნიტურ მუსლიმურ ჯგუფზე, რომელიც ახორციელებდა თავდასხმებს ირანის ტერიტორიაზე და არა პაკისტანის მოქალაქეებზე.

კვირის დასაწყისში ირანმა, ასევე, შეუტია ობიექტებს ერაყსა და სირიაში — მან თქვა, რომ დაარტყა ისლამურ სახელმწიფოს და ისრაელის დაზვერვის სააგენტო მოსადს, რადგანაც, მათი თქმით, ორივე მათგანი მონაწილეობდა ირანის ქალაქ კერმანში მომხდარ აფეთქებაში.

ანალიტიკოსების ნაწილი ვარაუდობს, რომ ისლამაბადმა ირანზე თავდასხმა შიდა ზეწოლის გამო მიიღო. ქვეყანაში თებერვალში არჩევნები უნდა გაიმართოს.

• ”იყო დიდი საზოგადოებრივი ზეწოლა მთავრობაზე, რომ რაღაც გაეკეთებინა [ირანის დარტყმის საპასუხოდ] და ამიტომ მათ გააკეთეს ეს მხოლოდ იმისთვის, რომ დაემტკიცებინათ, რომ ისინი არ არიან ნაკლები [ირანზე],” - თქვა პაკისტანის ყოფილმა თავდაცვის მდივანმა ასიფ იასენმა.
• ის ფიქრობს, რომ დაპირისპირება "აქ შეჩერდება" და პაკისტანი ირანთან დიალოგის განახლებას შეძლებს.
• ექსპერტების ნაწილი კი ამბობს, რომ ირანის დარტყმები ერაყზე, სირიასა და პაკისტანზე, ბოლო დღეებში, ასევე, განპირობებული იყო ახლო აღმოსავლეთში მიმდინარე ტურბულენტური დინამიკით.

თეირანმა განაცხადა, რომ არ სურს ჩაერთოს ისრაელ-ღაზას კონფლიქტში, მაგრამ ჯგუფები, რომლებსაც ის მხარს უჭერს, თავს ესხმიან ისრაელს და მის მოკავშირეებს, პალესტინელების მიმართ სოლიდარობის ნიშნად.

თუმცა The Economist-ის სამხედრო მიმართულების რედაქტორი, შაშანკ ჯოში, ამბობს, რომ მას არ სჯერა, რომ დარტყმები არის 7 ოქტომბრის ჰამასის თავდასხმების შედეგი ისრაელზე. მისი თქმით, ირანი კერმანში მომხდარი აფეთქების გამო არის აღშფოთებული.

• "ეს არ არის პირველი შემთხვევა, როდესაც საზღვართან დაძაბულობას აქვს ადგილი, მაგრამ ეს არის დაძაბულობის ყველაზე სერიოზული ესკალაცია, რაც მე მახსოვს",— თქვა მან.

ჩინეთმა, რომელიც ორივე ქვეყნის ძლიერი მოკავშირეა, მოუწოდა მხარეებს, გამოიჩინონ თავშეკავება და თავიდან აიცილონ ესკალაცია.