მოკლედ: On.ge-სთან საუბარში, ნატა ფერაძე იტყობინება, რომ დატოვა საცხოვრებელი სახლი და უსაფრთხო ადგილას გადავიდა, რადგან "დღეს, სამ საათზე, იკრიბებიან "ინაშვილები" მეტრო რუსთაველთან, ჩემი სახლის სიახლოვეს. შაბათს კიდევ ერთი აქციაა დაანონსებული და ვიფიქრე, რომ ახლა უაზრო გმირობანას თამაშის დრო არ არის და გამოვეცალე ჩემს სახლს", — თქვა აქტივისტმა.

დეტალები: როგორც ფერაძე ამბობს, ამჟამად ის "გისოსებიან, ჩაკეტილ ადგილას" იმყოფება.

  • ფერაძემ ასევე გვითხრა, რომ საქართველოს ახალგაზრდა იურისტთა ასოციაციის (საია) იურისტების დახმარებით მიმართვის ტექსტს ამზადებს: "ვწერთ მიმართვას, რომ სანამ მწვავე პერიოდია, სახელმწიფომ უზრუნველყოს ჩემი და ჩემი ოჯახის წევრების დაცვა", — ამბობს ფერაძე.

რა მოხდა: გუშინ, 10 იანვარს, ნატა ფერაძის სახლთან პრორუსული, ძალადობრივი მოძრაობა ალტ-ინფომ აქცია გამართა. ისინი სამების ტაძარში მატრონა მოსკოველის ხატისთვის საღებავის შესხმას აპროტესტებენ. ადგილზე მობილიზებული იყო პოლიცია.

  • 6 იანვარს პარტია ევროპული საქართველოს წევრმა, გიორგი კანდელაკმა სამების ტაძარში გადაღებული ვიდეო გამოაქვეყნა, სადაც ჩანს მატრონა მოსკოველის ხატი, რომლის ერთ-ერთ ფრაგმენტზე იოსებ სტალინია გამოსახული.
  • 7 იანვარს საქართველოს პატრიოტთა ალიანსის წევრებმა ირმა ინაშვილმა გამოაქვეყნა ვიდეო, სადაც ამბობს, რომ მატრონა მოსკოველის ხატი, რომელზეც იოსებ სტალინია გამოსახული, სამების საკათედრო ტაძარს "მათ შესწირეს";
  • 9 იანვარს, აქტივისტმა ნატა ფერაძემ თავის სოციალურ ქსელში გამოაქვეყნა ვიდეო, სადაც მატრონა მოსკოველის ხატს ლურჯი საღებავი შეასხეს.