მოკლედ: დემოკრატიის კვლევის ინსტიტუტმა (DRI), პრემიერ-მინისტრსა და პარლამენტის თავმჯდომარეს ინიციატივით მიმართა, საოკუპაციო ხაზთან მდებარე სოფლებს მიენიჭოს სპეციალური დასახლების სტატუსი, რაც ამ სოფლების მოსახლეობას შესაბამისი სოციალურ-ეკონომიკური შეღავათებით სარგებლობის შესაძლებლობას მისცემს.

დეტალები: DRI მიიჩნევს, რომ სპეციალური დასახლების სტატუსის მინიჭებამდე, საოკუპაციო ხაზთან მდებარე 116-ივე სოფელზე უნდა გავრცელდეს საქართველოს კანონით "მაღალმთიანი რეგიონების განვითარების შესახებ“ დადგენილი შეღავათები.

დემოკრატიის კვლევის ინსტიტუტის განცხადებით, საოკუპაციო ხაზთან მდებარე სოფლებში მდგომარეობა გართულებულია რუსეთის უკრაინაში შეჭრის შემდეგ.

  • 2023 წელს საოკუპაციო ძალების წარმომადგენლებმა საქართველოს ორი მოქალაქე - თამაზ გინტური და ვიტალი კარბაია მოკლეს.
  • აფხაზეთში გააქტიურებულია ანექსიური პროცესები - სამხედრო ფლოტის განთავსება ოჩამჩირეში, სოხუმის აეროპორტის და ბიჭვინთის აგარაკების ტერიტორიის რუსეთის სახელმწიფოს ფაქტობრივ საკუთრებაში გადაცემა.
  • მოსახლეობისთვის ყველაზე მწვავე პრობლემა სიღარიბე და უმუშევრობაა; ბორდერიზაციის პირობებში მაცხოვრებელ მოსახლეობას გატაცების და უკანონო დაკავებების მუდმივ შიშში უწევს ცხოვრება.

სწორედ ამიტომ, არასამთავრობო ორგანიზაცია მიიჩნევს, რომ საოკუპაციო ხაზთან მდებარე სოფლებში არსებული მწვავე სოციალურ-ეკონომიკური პრობლემების შესამსუბუქებლად, აუცილებელია, მოსახლეობა შეღავათებით სარგებლობდეს.