თაგვები რომ იმაზე ჭკვიანები და მოხერხებულები არიან, ვიდრე გვგონია, ეს ბევრჯერ დამტკიცდა. მაგალითად, რამდენიმე წლის წინ გავიგეთ, რომ ლედი გაგას სიმღერები ზუსტად ჩვენნაირად ჰყვარებიათ. ამჯერად კი, კიდევ უფრო გასაოცარი ამბის შესახებ შევიტყვეთ — თურმე ნუ იტყვით, და ეს პატარა არსებები უწესრიგობას ვერ იტანენ; ყოველ შემთხვევაში, როდნი ჰოლბრუკის ფარდულს შემოჩვეული თაგვი მაინც.

ჰოლბრუკი უელსელი ფოტოგრაფია, რომელმაც ცოტა ხნის წინ უჩვეულო ამბავი შენიშნა: მის ფარდულში ღამით უწესრიგოდ დატოვებული ნივთები მეორე დღეს თავ-თავიანთ ადგილზე დაბრუნებული ხვდებოდა. მისტიკური მოვლენის ამოსახსნელად როდნიმ ღამის ხედვის კამერა დაამონტაჟა და სწორედ ასე აღმოაჩინა, რომ საქმეში, არც მეტი, არც ნაკლები, თაგუნიას ხელი ერია.

"ეს ამბავი თვეების განმავლობაში გრძელდებოდა", — უყვება 75 წლის ფოტოგრაფი BBC-ს, — "მას მოწესრიგებული უელსელი თაგვი შევარქვი. თავდაპირველად შევნიშნე, რომ ჩიტებისთვის დატოვებული საკვები ფარდულში შენახულ ძველ ფეხსაცმელებში ჩნდებოდა. მერე კი კამერაც დავაყენე".

კამერით გადაღებულ ვიდეოში ჩანს, როგორი მონდომებით აგროვებს თაგუნია დაყრილ სარჭებს, საცობებს, ქანჩებს და ჭანჭიკებს, მერე კი ყველაფერს თავის ადგილს უჩენს და ყუთში აწყობს.

ჰოლბრუკს დააინტერესა, წესრიგის მოყვარული თაგვი შედარებით მოზრდილ ნივთებსაც თუ დაეჭიდებოდა და ნანახმა გააოცა — ფარდულში გაშინაურებულმა სტუმარმა ცალუღებიც კი აიღო და ყუთში დააბრუნა.

"ვერ ვიჯერებდი, როცა ეს ვნახე, ყველანაირ ნივთს ეზიდებოდა ყუთისკენ", — იხსენებს ფოტოგრაფი, — "ახლა უკვე აღარც ვიწუხებ თავს დალაგებით, რადგან ვიცი, რომ დილით ყველაფერი დაბინავებული დამხვდება".

სხვათა შორის, მსგავსი ამბავი ბრიტანეთში რამდენიმე წლის წინაც მოხდა. ბრისტოლის მახლობლად მცხოვრები კაცი ირწმუნებოდა, რომ დილაობით ფარდულში ნივთები გადაადგილებული ხვდებოდა. ადგილის მეპატრონემ მაშინაც კამერა დაამონტაჟა და ასე გაირკვა, რომ მისტიკური დამლაგებელი კვლავაც თაგუნია გახლდათ.