ქარჩხაძის გამომცემლობამ 2023 წელს ერთგულ მკითხველს საინტერესო, განსხვავებული სიახლეები შესთავაზა. თარგმნილი პროზა თუ ქართველი ავტორის კრებული, სასწავლო მასალა და ალბომები - ეს ის სხვადასხვა ჟანრის წიგნებია, რომლებიც ქარჩხაძის გამომცემლობის 2023 წლის კატალოგს შეემატა. რა თქმა უნდა, ყველაზე სასიამოვნო ისაა, როდესაც მკითხველის მოლოდინები მართლდება. ერთად გადავავლოთ თვალი ამ სიახლეებს.

ანა ბერნსი "მერძევე"

ბუკერის პრემიის მფლობელი წიგნის თარგმნა ყოველთვის დიდი პასუხისმგებლობაა. ეს საერთაშორისოდ აღიარებული ჯილდო თავისთავად საინტერესოს ხდის წიგნს, თავიდანვე ბევრი ადამიანი ინტერესდება. საბედნიეროდ, მერძევემ მოლოდინს გადააჭარბა, წლის ერთ-ერთი ბესტსელერი მალევე გახდა და ბევრი, ძალიან ბევრი ადამიანის დადებითი შეფასებაც დაიმსახურა. ყველაზე სასიხარულო კი ისაა, რომ ერთგულმა მკითხველმა, განურჩევლად ასაკისა, საკუთარი თავი, საკუთარი ისტორიები აღმოაჩინა წიგნში, თურმე რამდენი საერთო გვქონია ირლანდიასთან...

მეგი ო'ფერელი "ჰამნეტი"

როგორი შეიძლებოდა ყოფილიყო შექსპირი, დღემდე საიდუმლოებით მოცული პიროვნება ანდა როგორ დაიწერა "ჰამლეტი", ერთ-ერთი ყველაზე ცნობილი ტრაგედია მსოფლიოში... მეგი ო’ფერელმა "ჰამნეტით" სავარაუდო რეალობა შესთავაზა მკითხველს. ოჯახური ტრაგედია, დიდი სიყვარულისა და ცოლქმრობის ისტორია. ვინ როგორ უმკლავდება დიდ დანაკლისსა და ტკივილს. ადამიანური გრძნობები, რომლებიც საოცრად აღწერა ავტორმა "ჰამნეტში". რა თქმა უნდა, ქართველმა მკითხველმა წიგნი მალევე შეიყვარა, დადებითად შეაფასა და თითოეული გმირის თავგადასავალიც განიცადა.

იაა ჯასი "დაბრუნება"

ყოველთვის საინტერესოა, როგორ მიიღებს ქართველი საზოგადოება ნაკლებად ცნობილი მწერლის წიგნს, როგორ შეაფასებს ახალ თარგმანს. "დაბრუნება" იაა ჯასის საერთაშორისოდ აღიარებული რომანია, რომელიც თაობათა ისტორიას საოცარი ოსტატობით მოგვითხრობს. ქართველი მკითხველის განსაკუთრებული მოწონება დაიმსახურა წიგნში აღწერილმა პერსონაჟებმა, მათმა ხასიათმა და ცხოვრების დაუნდობლობით გამოწვეული ტკივილის გამკლავების უნარმა. მკითხველთა შეფასებით, ეს ის წიგნია, რომელშიც ყველას გულშემატკივრობ, ყველა პერსონაჟს თანაუგრძნობ და გინდა, რომ ყველაფერს კეთილი დასასრული ჰქონდეს, თუმცა ყოველთვის ასე როდია...

მარჯან ქამალი "საკანცელარიო მაღაზია თეირანში"

თარგმნილი პროზის ბოლო სიახლე 2023 წელს იყო "საკანცელარიო მაღაზია თეირანში". როგორც ჩანს, ქარჩხაძის გამომცემლობის ერთგული მკითხველი ამ სიახლეს მოუთმენლად ელოდა, რადგან წიგნის საახალწლო ფესტივალზე გამოჩენისთანავე იქცა ბესტსელერად. მარჯან ქამალის რომანი მკითხველის დაინტერესებას პირველივე გვერდებიდან ახერხებს. ირანის რევოლუციასთან დაკავშირებული ისტორიები, წიგნში აღწერილი სიტუაციაც ქართველი მკითხველისთვის, სამწუხაროდ, ძალიან ნაცნობი აღმოჩნდა. მარტივი ენით დაწერილი სიყვარულის ტრაგიკული ისტორია გულგრილს არავის ტოვებს, მთავარ გმირებს აუცილებლად თანაუგრძნობს მკითხველი.

ლია ლიქოკელი "გოგოობის კანონი, დევის ცოლის სიცილი"

ლია ლიქოკელის ტირაჟამოწურული წიგნების დაბრუნებას წლებია ელოდა და ითხოვდა ერთგული მკითხველი. „გოგოობის კანონი“ და „დევის ცოლის სიცილი“ პოეტური კრებულებია, რომლებიც სხვადასხვა დროს გამოვიდა, საზოგადოების აღფრთოვანება მალევე დაიმსახურა, თუმცა ტირაჟების ამოწურვის გამო ბევრმა ვერ შეძლო, ავტორს სრულფასოვნად გასცნობოდა. სწორედ ამიტომ ქარჩხაძის გამომცემლობამ 2023 წელს ლია ლიქოკელის ცნობილი ორი პოეტური კრებულის განმეორებითი ტირაჟი ამჯერად ერთ წიგნად დაბეჭდა. რა თქმა უნდა, სიახლეების გარეშე განმეორებით ტირაჟი არ დაბეჭდილა - წიგნში შესულია ლია ლიქოკელის მიერ ახლად დამატებული ლექსები, რომლებიც თავდაპირველ კრებულებში არ დაბეჭდილა.

დაიენ ბრაიანტი, ბრაიან ბრაიანტი, დებორა სმითი "სპეციალური საჭიროების მქონე მოსწავლეების სწავლება ინკლუზიურ გარემოში"

ეს ის წიგნია, რომელიც საქართველოში დღევანდელი განათლებისთვის ერთ-ერთი მნიშვნელოვანი სიახლეა. წიგნმა მაშინვე დაიმსახურა დიდი ყურადღება, გამოხმაურება და დაინტერესება. რაც ყველაზე სასიხარულოა, წიგნის მარტივმა ენამ, ფართო საზოგადოებისთვის გათვლილმა მაგალითებმა დიდი მოწონება დაიმსახურა, რადგან სამეცნიერო ლიტერატურა ხშირად, სამწუხაროდ, გაუგებარი ენითაა დაწერილი ან/და თარგმნილი.

ჯემალ ქარჩხაძე "იგი" ინგლისურ ენაზე

ქარჩხაძის გამომცემლობამ 2023 წელი მნიშვნელოვანი სიახლით დაიწყო — უცხო ენაზე თარგმნილი ნებისმიერი ქართული პროზა თუ პოეზია ყოველთვის სასიხარულო ამბავია. ინგლისურ ენაზე ჯემალ ქარჩხაძის "იგი" პირველად ითარგმნა და არაერთი მოწონებაც დაიმსახურა, რაც მთავარია, ნაწარმოებს უკვე არა მხოლოდ ქართველი, არამედ უცხოელი მკითხველიც იცნობს.

კოტე სულაბერიძე "იგის" სერიგრაფია

კოტე სულაბერიძის მიერ გაფორმებული "იგი" მკითხველმა დიდი ხანია შეიყვარა, მის გარეშე აღარც კი წარმოუდგენია. დიდი პოპულარობისა და მოთხოვნის გამო ქარჩხაძის გამომცემლობამ შექმნა "იგის" ილუსტრაციების სერიგრაფიის ტექნიკით შესრულებული საავტორო პრინტები. რა თქმა უნდა, ერთგული მკითხველისთვის "იგის" სერიგრაფიები წლევანდელი წლის ერთ-ერთი მოულოდნელი, თუმცა სასიამოვნო და ძვირფასი სიახლე იყო.

100 ქართული ხატი / 100 Georgian Icons

წიგნი-ალბომი, რომელიც ქართველი მკითხველისთვის ერთ-ერთი სასიხარულო სიახლე აღმოჩნდა. ალბომისთვის ხატები ქრონოლოგიური, ისტორიული, შინაარსობრივი და მხატვრული მონაცემების მიხედვით შეირჩა და წარმოდგენილია მათი ტიპოლოგიური, ტექნოლოგიური, შინაარსობრივი და მხატვრული მრავალფეროვნება. ალბომი განსაკუთრებით საინტერესოა მათთვის, ვისთვისაც ძვირფასია ქართული კულტურა და მისი ერთ-ერთი მნიშვნელოვანი შემადგენელი ნაწილი – საოცარი ხატები. მნიშვნელოვანია იმის აღნიშვნაც, რომ წიგნი ორენოვანია და საქართველოს კულტურით დაინტერესებული უცხოელებიც შეძლებენ მის გაცნობას.

ზურაბ ნიჟარაძე "გრაფიკული კონტრაპუნქტი"

ქარჩხაძის გამომცემლობის 2023 წლის ბოლო, სასიხარულო სიახლე ზურაბ ნიჟარაძის "გრაფიკული კონტრაპუნქტია". ალბომში შესულია ფართო საზოგადოებისთვის ჯერაც უცნობი ჩანახატები, რომლებიც 7 თავშია გადანაწილებული – ზოგადი ჩანახატები, მითოლოგიური თემები, დეტალები, პორტრეტები, შიშველი ფიგურები, წიგნის ილუსტრაციები და თეატრალური ესკიზები. ზურაბ ნიჟარაძის ჩანახატები, ესკიზები, ქაღალდის ნაგლეჯებზე შესრულებული პატარა შედევრები წარმოადგენენ წიგნის ძირითად ბირთვს და იმ ძვირფას მასალას, რომელიც განვითარებას პოულობს მის უფრო დიდ და ცნობილ ნამუშევრებში. ვფიქრობთ, ეს წიგნი განსაკუთრებით საინტერესო იქნება დამწყები მხატვრებისთვის.

აღსანიშნავია, რომ ქარჩხაძის გამომცემლობის მიერ 2023 წელს გამოცემული წიგნები საზოგადოებამ დიდი სიამოვნებით მიიღო, შეიყვარა. ახალმა წიგნებმა ინტერნეტ სივრცეში ბევრი ემოცია დაიმსახურა, დაიწერა ბევრი პოსტი და მიმოხილვაც. გამომცემლობა 2024 წელსაც სიახლეებით, სიურპრიზებითა და ბევრისთვის ნანატრი, ზოგისთვის კი უცნობი წიგნებით შეხვდება.