რა ხდება: ელჩების კონფერენციას, რომელიც საგარეო საქმეთა სამინისტროს ორგანიზებით იმართება, საქართველოს პრეზიდენტი არ ესწრება.

  • პრეზიდენტის ადმინისტრაციის განცხადებით, 26-28 დეკემბერს დაგეგმილ ელჩების კონფერენციაზე დასასწრებად საქართველოს პრეზიდენტს მიწვევა არ მიუღია.

დეტალები: საზღვარგარეთ საქართველოს დიპლომატიური წარმომადგენლობებისა და საკონსულო დაწესებულებების ხელმძღვანელთა ყოველწლიური შეკრება - "ელჩების კონფერენცია 2023, საქართველო – ევროკავშირის კანდიდატი ქვეყანა" დღეს გაიხსნა.

სიტყვით გამომსვლელთა შორის იყვნენ პრემიერ-მინისტრი, პარლამენტის თავმჯდომარე, საგარეო საქმეთა მინისტრი.

  • ორგანიზატორების ინფორმაციით, კონფერენციის მთავარი ფოკუსი ევროკავშირის გადაწყვეტილებაა, საქართველოსთვის კანდიდატის სტატუსის მინიჭების შესახებ.
  • ღონისძიების ფარგლებში, ასევე, მნიშვნელოვანი ყურადღება დაეთმობა 2023 წელს საგარეო პოლიტიკური პრიორიტეტების მიმართულებით გაწეულ სამუშაოებს და 2024 წლის გეგმებსა და ამოცანებს.
  • ისაუბრებენ რეგიონში არსებულ უსაფრთხოების გარემოზე, საქართველოს როლზე რეგიონული მშვიდობისა და თანამშრომლობის ხელშეწყობისთვის.