მოკლედ: სალომე ზურაბიშვილმა დაავადებათა კონტროლის ყოფილი ხელმძღვანელი, ამირან გამყრელიძე ბრწყინვალების ორდენით დააჯილდოვა.

დეტალები: პრეზიდენტის ადმინისტრაციის განმარტებით, გამყრელიძეს ორდენი "ჯანდაცვის სისტემის განვითარებაში შეტანილი დიდი წვლილისათვის, COVID-19-ის პანდემიის წინააღმდეგ ბრძოლაში განსაკუთრებული დამსახურებისთვის, უმაღლესი პროფესიონალიზმისა და ქვეყნისათვის თავდაუზოგავი შრომისათვის, წარმატებული პედაგოგიური და მეცნიერული მოღვაწეობისათვის" გადაეცა.

  • სალომე ზურაბიშვილმა დაჯილდოების ცერემონიალზე თქვა, რომ გამყრელიძის საქმიანობა მედიცინაში საამაყოა.

"მინდა, თქვენ მიმართ ძალიან დიდი მადლიერება გამოვხატო. ძალიან მნიშვნელოვანია ადამიანების დაფასება და პოზიტივი, რათა ვიცოდეთ, რა არის დადებითი, რა არის პროგრესი, რომელიც უნდა დავაფასოთ, ხელი შევუწყოთ და დავეხმაროთ“,— განაცხადა საქართველოს პრეზიდენტმა.

  • ამირან გამყრელიძემ ჯილდოსთვის მას მადლობა გადაუხადა და აღნიშნა, რომ კარიერის განმავლობაში მისთვის ეს პირველი ჯილდოა.

"არ ვიყავი მიჩვეული, ზოგადად, ჯილდოების მიღებას, მაგრამ დღეს ჩემთვის ეს განსაკუთრებულია, განსაკუთრებით, თქვენგან, ქალბატონო პრეზიდენტო", — თქვა გამყრელიძემ,— "მადლობა იმისთვის, რასაც თქვენ აკეთებთ, აკეთებდით და გააკეთებთ ამ დიდი გზაზე, რომელიც ჩვენი ყველა თაობის საოცნებო მიზანი გახლავთ და იმედია, რომ ჩვენი შვილები და შვილიშვილები იცხოვრებენ ნამდვილ, ძლიერ, უსაფრთხო და ევროპულ საქართველოში. მადლობა ამისთვის თქვენ".

ბოლო ხაზი: ამირან გამყრელიძე დაავადებათა კონტროლის და საზოგადოებრივი ჯანმრთელობის ეროვნულ ცენტრს 2013 წლის 7 თებერვლიდან ხელმძღვანელობდა.

  • 2022 წლის 5 აგვისტოს, ჯანდაცვის მინისტრმა ზურაბ აზარაშვილმა თქვა, რომ გამყრელიძე თანამდებობას ტოვებდა.
  • მანამდე, წყაროებზე დაყრდნობით ვრცელდებოდა ინფორმაცია, რომ გამყრელიძისა და ღარიბაშვილს შორის დაპირისპირება იყო.