რა ხდება: საქართველოს შინაგან საქმეთა მინისტრმა ვახტანგ გომელაურმა და გერმანიის შინაგან საქმეთა ფედერალურმა მინისტრმა ნენსი ფეზერმა ხელი მოაწერეს ორ ქვეყანას შორის მიგრაციისა და მობილობის შესახებ შეთანხმებას.

• ფეზერი საქართველოში ოფიციალური სამუშაო ვიზიტით იმყოფება.

რას ითვალისწინებს შეთანხმება: რამდენიმე მნიშვნელოვან საკითხს, მათ შორის — არალეგალური მიგრაციის წინააღმდეგ ბრძოლის გაძლიერებას, რაც, შსს-ს განმარტებით, გულისხმობს თანამშრომლობის განმტკიცებას საქართველოს იმ მოქალაქეთა რეადმისიის და რეინტეგრაციის უზრუნველყოფის მიმართულებით, რომლებიც უვიზო მიმოსვლის რეჟიმს დაარღვევენ.

ვახტანგ გომელაურმა ერთობლივ ბრიფინგზე განმარტა, რომ პროექტის მიხედვით, მხარეები მოახდენენ უკანონო მიგრაციისა და მისი ხელშეწყობის, ადამიანით ვაჭრობით, ტრეფიკინგის, დოკუმენტებისა და ვიზების ბოროტად გამოყენების პრევენციასა და მის წინააღმდეგ ბრძოლას.

რა იცვლება გერმანიაში მყოფი საქართველოს მოქალაქეებისთვის

ნენსი ფეზერის თქმით, თავშესაფრის მაძიებელთა ინდივიდუალური უფლების მხრივ — არაფერი.

• მისი განცხადებით, გერმანიაში თავშესაფრის მაძიებელთა განცხადების დაკმაყოფილების კვოტა 0,3%-ია.
• მან, ასევე, აღნიშნა, რომ საქართველოს მიენიჭა უსაფრთხო ქვეყნის სტატუსი, რათა საქართველოს მოქალაქეები ამ მასშტაბით არ ჩადიოდნენ გერმანიაში და არ ითხოვდნენ თავშესაფარს.

"გერმანიაში მესამე ქვეყნებიდან ძალიან ბევრი შემოდის, ჩვენც გარკვეული ღონისძიებები უნდა განგვეხორციელებინა სწრაფად და ეფექტურად ამის დასაძლევად. ჩვენ გავაკეთეთ ის, რომ საქართველომ მიიღო უსაფრთხო ქვეყნის სტატუსი, ეს ძალიან მნიშვნელოვანია, რათა საქართველოს მოქალაქეები ამ მასშტაბით არ ჩამოდიოდნენ და არ ითხოვდნენ თავშესაფარს. ასევე მიგრაციის შეთანხმებაც მნიშვნელოვანია, იმიტომ, რომ გასული 3 წლის განმავლობაში გაიზარდა, მაგალითად, უკრაინიდან 60%-ით მიგრაციის მაჩვენებელი“,- განაცხადა ნენსი ფეზერმა.

ვის გამოაძევებენ გერმანიიდან

საქართველოს შს მინისტრის განცხადებით, დეპორტაცია შეეხებათ იმ მოქალაქეებს, ვინც გერმანიაში არალეგალურად იმყოფებიან.

"ბევრი მიდიოდა ვითომ სამუშაოდ და მერე ქრებოდა, ხან სხვა ქვეყანაში ვპოულობდით, ხან იყო ქურდობა, სამწუხაროდ, გვინდა თუ არ გვინდა, ეს ხდება. ამაზეა საუბარი, თორემ, ადამიანი, რომელიც მუშაობს იქ პატიოსნად და ოფიციალურად გაფორმებულია, პრობლემა არ შეექმნება.

მკურნალობაზეც, ხაზს ვუსვამ, თუ რაღაც ისეთია [სამედიცინო პროცედურა], რომელიც ჩვენთან ვერ კეთდება და იქ კეთდება, არ იქნება მის გამოძევებაზე საუბარი, მაგრამ თუ შეუძლია რომ აქ გაიკეთოს რაღაც ოპერაცია, რომელიც საქართველოშიც კეთდება ჩვეულებრივად და — არა "მე ახლა, მაინც და მაინც, მინდა გერმანიაში, ან ამერიკაში", დაარღვია [სავიზო რეჟიმი], ვადა გადავიდა... თორემ ვინც მკურნალობს და იქ არის წლები, ვთქვათ, ისეთი დაავადებით, რომელიც აქ არ იკურნება, იმას არავინ შეეხება", - ამბობს ვახტან გომელაური.

კიდევ რა წერია შეთანხმებაში, რომელსაც დღეს ხელი მოეწერა

შს სამინისტროს მიერ გავრცელებული ინფორმაციით, შეთანხმება მიზნად ისახავს შრომითი მიგრაციისა და განათლების მიმართულებით ორ ქვეყანას შორის თანამშრომლობის გაძლიერებას.

• ქართველი სტუდენტებისა და მკვლევარებისთვის მეტი ინტენსივობით განხორციელდება საგანმანათლებლო და სტაჟირების პროგრამები.