დამოუკიდებელი აზერბაიჯანული ონლაინ ტელეარხის, Kanal 13-ის დამფუძნებლის დაკავებიდან 1 კვირის შემდეგ, ამავე ტელეარხის წამყვანს, 30-დღიანი ადმინისტრაციული პატიმრობა მიესაჯა.

რუფატ მურადლის ბრალი წვრილმანი ხულიიგნობისა და პოლიციისადმი დაუმორჩილებლობისთვის ორშაბათს წაუყენეს. ის შაბათს დააკავეს, მას შემდეგ, რაც, პოლიციის თქმით, ბაქოში სამართალდამცველებს დაუპირისპირდა.

მურადლის ადვოკატი, ნაზიმ მუსაევი აცხადებს, რომ მისი დაცვის ქვეშ მყოფი, სამოქალაქო ტანსაცმლიან პოლიციელებს სიტყვიერად დაუპირისპირდა.

"მათ შორის რაღაც მოხდა, რუფატმა წინააღმდეგობა გაუწია და ამიტომ დააკავეს", — თქვა მუსაევმა.

მურადლი "კანალ 13-ის" უკვე მეორე ჟურნალისტია, რომელიც არხის მფლობელის, აზიზ ორუჯოვისა და კიდევ ერთი თავისუფალი გამოცემის, "აბაზსმედიის" რამდენიმე თანამშრომლის დაპატიმრების შემდეგ დააკავეს.

მურადლი, ასევე, არის აზერბაიჯანის დემოკრატიისა და კეთილდღეობის პარტიის წევრი, რომლის თავმჯდომარე გუბად იბადოღლუ აგვისტოს შემდეგ ციხეში იმყოფება, ყალბი ფულის შეძენის, ან დაბეჭდვის ბრალდებით.

იბადოღლუს დაკავების შემდეგ, დააკავეს მისი პარტიის რამდენიმე წევრიც.

პარტიის თავმჯდომარის მოადგილემ, ადალათ იუსუბოვმა მურადლის მიმართ წაყენებული ბრალდებებს ყალბი უწოდა.

"ჟურნალისტისა და პარტიის წევრის, რუფატ მურადლის დაკავება უზნეობისა და უკულტურობის მაგალითია“, — დაწერა იუსუბოვმა ფეისბუქზე —"ეს დაკავება არა მხოლოდ შეკვეთილი, არამედ, პოლიტიკური ხასიათისაა. დაკავების გადაწყვეტილება მიზნად ისახავს რუფატის პოლიტიკური აქტივობისა და ჟურნალისტის საქმიანობის შეზღუდვას".

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.