რაც გეჯავრებოდეს, ის გეძალებოდესო, რობერტ პატინსონის და ბინდის ურთიერთობაზეა ნათქვამი. ათწლეულზე მეტი გავიდა, რაც ინგლისელმა მსახიობმა თავის არცთუ საყვარელ ფილმების სერიაზე მუშაობა დაასრულა, მაგრამ ედვარდ კალენის ჩრდილს მაინც ვერაფრით დააღწია თავი.

მაისში მსახიობმა 37 წლის იუბილე აღნიშნა და წვეულებაც მოაწყო, სადაც სრულიად შემთხვევით, დაუპატიჟებლად აღმოჩნდა ჯერ ბინდის რეჟისორი ქეთრინ ჰარდვიქი, მოგვიანებით კი მხიარულებას ბელა სუონის შემსრულებელი კრისტენ სტიუარტიც შეუერთდა. ასე დაუგეგმავად გადაიქცა პატინსონის დაბადების დღე ვამპირულ წვეულებად.

"რობის დაბადების დღეზე ვიყავი ამას წინათ", — ჰყვება ჰარდვიქი ერთ-ერთ პოდკასტში, — "ჩემს მეგობარ ტონი კოლეტს გადავეყარე, რომელმაც მასთან ერთად გადაიღო ფილმი. ვერთობოდით და მერე კრისტენიც გამოჩნდა. სულ რამდენიმე თვის წინ მოხდა ეს ამბავი. მერე კი ყველანი გადავეხვიეთ ერთმანეთს, ძალიან მაგარი იყო".

რეჟისორის თქმით, წვეულებაზე ერთიმეორის გამოჩენა მარტო იუბილარს კი არა, თავადაც გაუკვირდათ.

"კრისტენი რომ მოვიდა, შემომხედა და მკითხა, 'ქეთრინ? რობის დაბადების დღეზე? რა ხდება?'", — იხსენებს ჰარდვიქი, — "ვუთხარი, ტონის გადავეყარე-მეთქი. მან მითხრა, მეც ასე აღმოვჩნდი აქო".

პოდკასტში კინორეჟისორმა ბინდისთვის პატინსონის და სტიუარტის გავლილი ქასთინგებიც გაიხსენა და აღნიშნა, რომ მათ შორის "ქიმია" პირველი შეხვედრისთანავე გაჩნდა.

"როცა ბიოლოგიის გაკვეთილის სცენა გაითამაშეს ჩემი სამზარეულოს მაგიდასთან, მაშინვე ნაპერწკლებმა დაიწყო ცვენა", — აღნიშნავს ქეთრინი.

რეჟისორის აღფრთოვანება კინოსტუდია Summit Entertainment-ში არ გაუზიარებიათ და პატინსონს მოუწია, დაემტკიცებინა, რომ როლისთვის შესაფერისი იყო. თუმცა, მოგვიანებით ამ ნაბიჯის გადადგმა აშკარად ინანა, რადგან ბინდი არაერთხელ გააკრიტიკა მწარედ.

ქეთრინ ჰარდვიქის გადაღებული ბინდი, რომელიც სტეფანი მეიერის ამავე სახელწოდების ბესტსელერი რომანის კინოადაპტაციაა, ეკრანებზე 2008 წელს გამოვიდა. ფილმმა $400 მილიონზე მეტი გამოიმუშავა და საუკუნის ერთ-ერთ ყველაზე წარმატებულ ფრენჩაიზს დაუდო საფუძველი. ჯამში ბინდის საგის ყველა ნაწილის შემოსავალმა $3,3 მილიარდს გადააჭარბა.

ასევე იხილეთ:

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...