2023 წლის საბავშვო ევროვიზიის ფინალურ შოუმდე სულ ცოტა დროღა რჩება. რიგით 21-ე საბავშვო ევროფესტივალს საფრანგეთის ქალაქი ნიცა 26 ნოემბერს უმასპინძლებს. 16 მონაწილე ქვეყანას შორის ერთ-ერთი საქართველოა, რომელსაც კონკურსზე ანასტასია ვასაძე, ნიკოლოზ ხარატი და ოთო ბაზერაშვილი წარადგენენ. ქართველმა მონაწილეებმა სულ ცოტა ხნის წინ Palais Nikaïa-ის არენაზე პირველი რეპეტიციაც გაიარეს.

ფოტო: Corinne Cumming / EBU

ფოტო: Corinne Cumming / EBU

ანასტასია, ნიკოლოზი და ოთო კონკურსზე მებო ნუცუბიძისა და ბეთხოს (ირაკლი მანჩხაშვილი) დაწერილ სიმღერას Over The Sky შეასრულებენ. ფინალში მაყურებლის წინაშე ისინი მე-10 ნომრად წარდგებიან.

ფოტო: Corinne Cumming / EBU

ანასტასია ვასაძემ წლევანდელ საბავშვო ევროფესტივალზე საქართველოს წარმომადგენლის სტატუსი პირველი არხის პროექტ რანინაში გამარჯვებით მოიპოვა. მოგვიანებით 11 წლის მომღერალს რანინას კიდევ ორი მონაწილე შეუერთდა.

ფოტო: Corinne Cumming / EBU

2023 წლის საბავშვო ევროვიზიის გამარჯვებულის გამოსავლენად ხმის მიცემა 24 ნოემბერს, საღამოს 11 საათზე (თბილისის დროით) დაიწყება. ხმა შეგიძლიათ მისცეთ როგორც საქართველოდან, ასევე სხვა ნებისმიერი ქვეყნიდან. ამისათვის უნდა ეწვიოთ ვებგვერდს jesc.tv

ფოტო: Corinne Cumming / EBU

საფრანგეთმა ევროვიზია ჯუნიორის მასპინძლობის უფლება გასულ წელს, ერევანში გამართულ კონკურსზე გამარჯვების შემდეგ მოიპოვა. ქვეყნის წარმომადგენელმა 13 წლის მომღერალმა, ლისანდრომ, შარშან ტელემაყურებლისა და ჟიურისგან ჯამში 203 ქულა მიიღო და საფრანგეთს კონკურსზე მეორე გამარჯვება მოუტანა. 2022 წელს საქართველოს წარმომადგენელმა მარიამ ბიგვავამ კი კონკურსზე მე-3 ადგილი დაიკავა 161 ქულით. ამასთან, მან ჟიურის მეორე უმაღლესი შეფასება დაიმსახურა.

ფოტო: Corinne Cumming / EBU

ევროვიზია ჯუნიორზე საქართველო ამ დრომდე რჩება ყველაზე წარმატებულ მონაწილე ქვეყნად. ჩვენს ანგარიშზე რეკორდული სამი გამარჯვება ირიცხება. 2008 წელს პირველი გამარჯვება ჯერ ჯგუფმა ბზიკებმა მოიპოვა, 2011 წელს პირველადგილოსანი გახდა ჯგუფი ქენდი, 2016 წელს მალტაზე გამართული კონკურსი კი მარიამ მამადაშვილმა მოიგო. ამას გარდა, საქართველომ ევროვიზია ჯუნიორზე ორჯერ დაიკავა მეორე ადგილი და ხუთჯერ მოხვდა საუკეთესო ხუთეულში.

ასევე იხილეთ:

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...