მოკლედ: პარტია ლელოს თავმჯდომარემ, მამუკა ხაზარაძემ, "საქართველოს დაცვის აქტის" ინიციატივის შესახებ განაცხადა და თქვა, რომ 9-პუნქტიან წინადადებას განსახილველად საქართველოს პარლამენტში ხვალ, 21 ნოემბერს წარადგენენ.

  • პარტია აცხადებს, რომ 9-პუნქტიან გეგმის მიზანია, "წამოიწყოს ქვეყნის უკან დაბრუნების პროცესი საქართველოში რუსეთისა და რუსების გავლენის დასრულების მიზნით".

რაზე ისაუბრა ხაზარაძემ: ქვეყანაში არსებულ სოციალურ და ეკონომიკურ გამოწვევებზე, სამუშაო ადგილების, მაღალი ფასების პრობლემასა და მზარდ მიგრაციაზე.

  • "ვკარგავთ ჩვენს ქვეყანას, რადგან საქართველოს ხელისუფლება კომფორტს უქმნის ოკუპანტი ქვეყნის მოქალაქეებს და ემსახურება რუსეთს, ნაცვლად იმისა, რომ ემსახუროს საქართველოს და ქართველ ხალხს", — თქვა მან.

რას გულისხმობს ლელოს 9-პუნქტიანი გეგმა:

  • სავიზო რეგულაციის დაწესება რუსეთის მოქალაქეებისათვის;
  • დასაქმების ბაზრის დაცვა, რაც რუსეთის მოქალაქეებისათვის მუშაობის უფლების გაცემას შეზღუდავს;
  • მიწის გაყიდვის შეზღუდვა ოკუპანტი ქვეყნის მოქალაქეებისთვის — "მიწა ჩვენი ხალხის საკუთრებაა და არა ოკუპანტის", — თქვა ხაზარაძემ.
  • რუსული სანომრე ნიშნიანი მანქანების აკრძალვა;
  • რუსული კომპანიებისთვის სახელმწიფო ტენდერებში მონაწილეობის აკრძალვა;
  • რუსული ბიზნესისთვის საოკუპაციო მოსაკრებლის დაწესება —"თანხები კი ოკუპირებული ტერიტორიებიდან იძულებით გადაადგილებულ პირებს მოხმარდება", — აღნიშნავს ლელო.
  • ფრენების აკრძალვა;
  • რუსული სატელევიზიო არხების მაუწყებლობის აკრძალვა;
  • რუსული ფონდების აკრძალვა.