IPM-ის კვლევით, საქართველოს მოსახლეობის 70 პროცენტი თითქმის არ დადის საზღვარგარეთ პირადი, ოფიციალური ან ტურისტული მიზნებით. იმ ადამიანებიდან ვინც საზღვარგარეთ დადის ყველაზე დიდი წილი თურქეთს სტუმრობს. კვლევა რეგიონსა და რუსეთში ჩატარდა და თითოეულ ქვეყანაში 1 200 რესპონდენტი გამოიკითხა.

გამოკითხულ სხვა ქვეყნებთან შედარებით, საქართველოს მოქალაქეები ყველაზე ნაკლებად სტუმრობდნენ სხვა ქვეყნებს. რესპონდენტთა დიდი ნაწილი - 70 პროცენტი საზღვარგარეთ ბოლო ხუთი წლის განმავლობაში პირადი, ოფიციალური ან ტურისტული მიზნებით არ ყოფილა. ქართველ ვიზიტორთა უმრავლესობა (13%) თურქეთს სტუმრობდა, სხვა ევროპულ ქვეყნებს კი მხოლოდ ოთხი პროცენტი.

შედარებით მაღალი მაჩვენებელია სომხეთში. გამოკითხულთა 55 პროცენტს არ დაუტოვებია ქვეყანა ბოლო ხუთი წლის განმავლობაში პირადი, ოფიციალური ან ტურისტული მიზნით. ის ადამიანები კი, ვინც ქვეყანას ტოვებდნენ ყველაზე დიდი წილი (32%) რუსეთში მიდოდა, შედარებით ნაკლები (16%) კი საქართველოში.

სომხეთის მსგავსი მონაცემია აზერბაიჯანშიც. აზერბაიჯანის გამოკითხული მოსახლეობის 56 პროცენტს ქვეყანა არ დაუტოვებია ქვეყანა ბოლო ხუთი წლის განმავლობაში პირადი, ოფიციალური ან ტურისტული მიზნით.ისინი კი ვინც ქვეყანას ტოვებდა რუსეთს (16%), თურქეთს (15%), საქართველოს (12%), არაბულ-ისლამური ქვეყნებსა (8%) და უკრაინას (4%) სტუმრობდნენ.

ამავე კვლევის ფარგლებში გამოიკვეთა, რომ რუსეთის მოქალაქეების 9 პროცენტმა უკრაინა, 7 პროცენტმა თურქეთი, 6 პროცენტმა კი ბელარუსი მოინახულა. გამოკითხულთა 57 პროცენტი კი არ სტუმრობდა რომელიმე ქვეყანას.

ზემოთ ჩამოთვლილი ქვეყნებიდან ბოლო ხუთი წლის განმავლობაში პირადი, ოფიციალური ან ტურისტული მიზნით საქართველოს ყველაზე მეტად (16%) სომხეთის მოქალაქე სტუმრობდა, შედარებით ნაკლები (12%) აზერბაიჯანიდან, რუსეთიდან კი მხოლოდ 2 პროცენტი.