ვოლოდიმირ ზელენსკი უკრაინის რუსეთის ფედერაციის 4 რეგიონზე მასშტაბურ თავდასხმას X-ზე ეხმაურება. უკრაინის პრეზიდენტის შეფასებით ეს უნიკალური ოპერაცია იყო, რომელიც წელიწადნახევარი რუსეთის უშიშროების ფედერალური სამსახურის (FSB) დირექტორის გვერდით იგეგმებოდა.

"ეს აბსოლუტურად უნიკალური ოპერაცია იყო. ოპერაციისთვის მზადება წელიწადნახევარი გრძელდებოდა და ჩვენი "ოფისი" რუსეთის ტერიტორიაზე პირდაპირ რუსეთის უშიშროების ფედერალური სამსახურის დირექტორატის გვერდით მდებარეობდა.

ოპერაცია 117 დრონმა ჩაატარა, შესაბამისი რაოდენობის დრონების ოპერატორებით. საჰაერო ბაზებზე განლაგებული სტრატეგიული ფრთოსანი რაკეტების გადამზიდავების 34% დაბომბეს.

ჩვენ გავაგრძელებთ ამ სამუშაოს," — წერს ზელენსკი.

პრეზიდენტმა ასევე დასძინა, რომ ოპერაციის მომზადებაში თვითონაც მიიღო მონაწილეობა და რუსეთიდან დროულად გაიყვანეს.

ვოლოდიმირ ზელენსკი უკრაინის უსაფრთხოების სამსახურის ხელმძღვანელს, ვასილ მალიუკის შეხვდა და წარმატებული ოპერაციისთვის მადლობა გადაუხადა და დასძინა, რომ "ეს ისეთი ოპერაციაა, რომელიც ისტორიის წიგნებში აუცილებლად შევა".

"უკრაინის უსაფრთხოების სამსახურის ხელმძღვანელმა ვასილ მალიუკმა წარმოადგინა ანგარიში დღევანდელი ოპერაციის შესახებ. აბსოლუტურად ბრწყინვალე შედეგი — შედეგი, რომელიც მხოლოდ უკრაინამ შეძლო. ერთი წელი, ექვსი თვე და ცხრა დღე გავიდა ოპერაციის დაგეგმვის დაწყებიდან მის წარმატებულ განხორციელებამდე. ეს ჩვენი ყველაზე შორ მანძილზე შესრულებული ოპერაციაა.

ოპერაციის მოსამზადებლად ჩართული პირები დროულად იქნენ გაყვანილნი რუსეთის ტერიტორიიდან. გენერალ მალიუკს უკრაინის ამ წარმატებისთვის მადლობა გადავუხადე. უსაფრთხოების სამსახურს დავავალე, საზოგადოებას მიაწოდოს ის დეტალები და შედეგები, რომელთა გასაჯაროებაც ამ ეტაპზე შესაძლებელია. ცხადია, ყველაფრის თქმის უფლება ახლა არ გვაქვს, მაგრამ ეს ისეთი ოპერაციაა, რომელიც ისტორიის წიგნებში აუცილებლად შევა.

უკრაინა იცავს საკუთარ თავს და ამას სრულიად სამართლიანად აკეთებს — ყველაფერს ვაკეთებთ იმისათვის, რომ რუსეთმა იგრძნოს ამ ომის დასრულების აუცილებლობა. რუსეთმა დაიწყო ეს ომი და რუსეთმა უნდა დაასრულოს.

დიდება უკრაინას!" — წერს ზელენსკი.

ცნობისთვის, უკრაინამ რუსეთის ფედერაციის 4 რეგიონში — ოლენიას, ბელაიას, დიაგილევოს და ივანოვოს აეროდრომებზე მასშტაბური თავდასხმა განახორციელა, რის შემდეგადაც ათობით თვითმფრინავს ცეცხლი გაუჩნდა. უკრაინული მედიის ცნობით, უკვე 40-ზე მეტი ბომბდამშენი იქნა განადგურებული. ზარალმა შესაძლოა 2 მილიარდ დოლარს გადააჭარბოს.