მოკლედ: ქართული ოცნების დეპუტატმა, ლევან მგალობლიშვილმა ენმ-ის ფრაქციის თავმჯდომარეს, თინა ბოკუჩავას სიტყვიერი შეურაცხყოფა მიაყენა და შეეცადა, მიკროფონი ესროლა ანი წითლიძისთვის. მგალობლიშვილი მანდატურმა გაიყვანა პლენარულ სხდომათა დარბაზიდან.

რით დაიწყო: საქართველოს პარლამენტში დღეს, 17 ნოემბერს, იუსტიციის მინისტრმა რატი ბრეგაძემ მინისტრის საათის ფარგლებში ისაუბრა.

• პენიტენციურ დაწესებულებში არსებულ ვითარებაზე საუბრისას თქვა, რომ ხელისუფლებაში ნაციონალური მოძრაობის ყოფნისას, პენიტენციურ დაწესებულებებში წამებას სისტემური ხასიათი ჰქონდა.
• ამას მოჰყვა ერთიანი ნაციონალური მოძრაობის დეპუტატების რეაქცია სხდომათა დარბაზში.
• მინისტრმა სექსისტური განცხადება გააკეთა თინა ბოკუჩავას მისამართით:
• "მე თქვენთვის შეურაცხყოფა არ მომიყენებია, ვისმენთ მხოლოდ თქვენს უზრდელობას. სირცხვილია, რომ ქალი ასეთ სიტყვებს კადრულობთ, იუსტიციის სასწავლო ცენტრში ზრდილობის გაკვეთილებს დაგიორგანიზებთ", — უთხრა ბრეგაძემ ბოკუჩავას.

კომენტარები:

• თინა ბოკუჩავა: "ქალი ოპოზიციური დეპუტატები, რომლებიც უკომპრომისოდ იბრძვიან ჩვენი ქვეყნის ევროპული, დემოკრატიული მომავლისთვის, მუდმივად ამორალური, უხამსი თავდასხმების სამიზნე ხდებიან რუსული ოცნების დეპუტატების მხრიდან.
• დღეს, ამგვარ თავდამსხმელად მოგვევლინა ალკოჰოლური თრობის მდგომარეობაში მყოფი ლევან მგალობლიშვილი, რომლის მხრიდანაც არასდროს გაგვიგია არც ერთი პოზიცია საპარლამენტო დებატებისას საქართველოსთვის საჭირბოროტო საკითხებზე."
• ანი წითლიძე: "როდესაც კითხვებზე პასუხები არ აქვთ, სრულ ისტერიკაზე გადადიან. თუ ეს ნამდვილად არის პარლამენტი, უნდა დაუწესოს სანქცია ბატონ მგალობლიშვილს იმის გამო, რაც მან იკადრა დარბაზში, და ასევე, ვითხოვთ, დაუყოვნებლივ შეამოწმონ ის ალკოჰოლურ ტესტზე, რადგან ეს ადამიანი არ იყო ფხიზელი".

პრეზიდენტის რეაქცია

მომხდართან დაკავშირებით განცხადება გაავრცელა საქართველოს პრეზიდენტმა, სალომე ზურაბიშვილმა. "პარლამენტი უკვე მერამდენედ ხდება არნახული სირცხვილის მოწმე", — აცხადებს პრეზიდენტი.

რა წერია ზურაბიშვილის განცხადებაში: "სწორედ იმის გამო, რომ ქალი დეპუტატების მიმართ მიუღებელი და აღმაშფოთებელი შეურაცხყოფის პირველ ტალღას პარლამენტისგან და უშუალოდ, პარლამენტის თავმჯდომარისგან რეაგირება არ მოჰყოლია, დღეს ვიხილეთ ის, რაც ვიხილეთ — მორიგი უმსგავსობა.

• კიდევ ერთხელ ვგმობ და ყოველთვის დავგმობ ქალთა მიმართ ნებისმიერი ფორმის ძალადობას. ეს არის ქართული კულტურისათვის შეუთავსებელი, უღირსი და სამარცხვინო საქციელი."

კონტექსტი: 31 ოქტომბერს პლენარულ სხდომაზე, ოპოზიციონერ დეპუტატებს, თეონა აქუბარდიასა და ანა წითლიძეს, სიტყვიერი შეურაცხყოფა მიაყენეს საპარლამენტო უმრავლესობის დეპუტატებმა — ალუდა ღუდუშაურმა და ირაკლი ბერაიამ.

• ზურაბიშვილმა მაშინაც გამოუცხადა სოლიდარობა ქალ დეპუტატებს და პარლამენტის თავმჯდომარეს, შალვა პაპუაშვილს უმკაცრესი ზომების მიღებისკენ მოუწოდა.

ბოლო ხაზი: ქალი პოლიტიკოსების მიმართ გამოყენებული შეურაცხმყოფელი ლექსიკა ცუდ საზოგადოებრივ ეფექტს ახდენს, რადგან:

• ამით პოლიტიკაშიც თავს იჩენს საზოგადოებაში დამკვიდრებული გენდერული სტერეოტიპები, რაც ჯერ კიდევ სერიოზული საზოგადოებრივი პრობლემა და გამოწვევაა.
• ამყარებს მტრულ წარმოდგენებს პოლიტიკაში ქალების მონაწილეობაზე.
• ქალების მიმართ, საჯაროდ გამოყენებული დამამცირებელი ლექსიკის ნორმალიზება პროვოცირებს ქალთა მიმართ ძალადობისა და შევიწროების დონის ზრდას.