მეთ ლებლანი, რომელიც Friends-ში ჯოი ტრიბიანის როლს ასრულებს, მეთიუ პერის გამოემშვიდობა. Friends-ის ვარსკვლავმა ინსტაგრამზე მეთიუ პერისთან ერთად გადაღებული რამდენიმე ფოტო გამოაქვეყნა და ვრცელი ტექსტიც დაურთო.

"მეთიუ, შენთან გამომშვიდობება ძალიან მიმძიმს. ის დრო, რომელიც ერთად გავატარეთ, ჩემი ცხოვრების ერთ-ერთი საუკეთესო პერიოდია. შენთან მეგობრობა და სცენის გაზიარება ჩემთვის დიდი პატივი იყო. როცა შენზე ვფიქრობ, ყოველთვის მეღიმება და არასდროს დაგივიწყებ. გაშალე ფრთები და იფრინე, ძმაო, საბოლოოდ თავისუფალი ხარ. როგორც ვხვდები, ის 20 დოლარი შეგიძლია დაიტოვო, რომელიც ჩემთვის უნდა დაგებრუნებინა", — წერს მეთ ლებლანი ინსტაგრამზე.

მეთ ლებლანკი Friends-ში მეთიუ პერის პერსონაჟის, ჩენდლერის, საუკეთესო მეგობრისა და რუმმეითის როლს ასრულებს. მეთიუს გარდაცვალებას Friends-ის მსახიობებიც გამოეხმაურნენ.

"ყველანი განადგურებულები ვართ მეთიუს დაკარგვის გამო. ჩვენ ერთმანეთისთვის ბევრად მეტნი ვართ, ვიდრე მხოლოდ Friends-ის მსახიობები. ჩვენ ოჯახი ვართ. ძალიან ბევრი რამის თქმა გვინდა, მაგრამ ახლა უბრალოდ დრო გვჭირდება გლოვისა და ამ წარმოუდგენელი დანაკარგის გასააზრებლად. როცა შეგვეძლება, მეტს ვიტყვით. ახლა ჩვენი ფიქრები მეთიუს ოჯახთანაა, სიყვარულს ვუგზავნით მათ, მეთიუს მეგობრებსა და ყველას მთელ მსოფლიოში, ვისაც ის უყვარდა", — წერს Friends-ის ხუთეული.

შეგახსენებთ, რომ სიტკომ Friends-ის მსახიობი და ჩენდლერის როლის შემსრულებელი მეთიუ პერი 28 ოქტომბერს 54 წლის ასაკში გარდაიცვალა. მსახიობი ლოს-ანჯელესში, საკუთარ სახლში, გარდაცვლილი იპოვეს, თუმცა ჯერჯერობით მისი გარდაცვალების მიზეზებზე ინფორმაცია ოფიციალურად არ დასტურდება.

ასევე იხილეთ: