მსახიობ ლიზა კეშის თქმით, რომელიც Friends-ის მე-5 სეზონის ერთ-ერთ სერიაში სტიუარდესას როლში გამოჩნდა, სხვა პერსონაჟი უნდა ეთამაშა, თუმცა სცენარი მოგვიანებით შეცვალეს. სერიალის ეპიზოდში, სახელად The One in Vegas: Part 1, ჩენდლერს მონიკასთვის სწორედ ლიზას პერსონაჟთან უნდა ეღალატა, რაზეც მეთიუ პერიმ უარი განაცხადა და სცენარის ცვლილება მოითხოვა.

"როცა სერიალში მიმიწვიეს, ძალიან ვღელავდი. ერთ-ერთ სცენაში მონიკა და ჩენდლერი ვეგასში არიან და კამათობენ, რის შემდეგაც ჩენდლერი სასტუმროს ნომერში ბრუნდება და მომსახურებას იძახებს. ამის შემდეგ მე, როგორც სასტუმროს თანამშრომელს, მისთვის შეკვეთა უნდა მიმეტანა. ჩვენ უნდა გვესაუბრა, ბევრი გვეცინა და ბოლოს ჩენდლერს მონიკასთვის ჩემი პერსონაჟის გამო უნდა ეღალატა", — ამბობს ლიზა კეში.

როგორც კეში იხსენებს, რეპეტიციებიც გაიარეს და ყველაფერი მზად იყო, თუმცა უშუალოდ გადაღების წინ პერი სცენარისტებთან მივიდა და უთხრა, რომ მაყურებელი ჩენდლერს მონიკას ღალატს არასდროს აპატიებდა. "ის მართალიც იყო და ეს მთელ შოუსა და მის ხასიათს შეცვლიდა", — დასძინა ლიზა კეშმა.

როგორც ჩანს, მეთიუ პერის შოუ ერთ-ერთი მთავარი სასიყვარულო ისტორიის გადარჩენა სურდა და გამოუვიდა კიდეც. სცენარისტებმა ღალატის სცენა ამოიღეს და ამის ნაცვლად ლიზა კეშმა სტიუარდესას როლი შეასრულა, რაც მისი თქმით, უფრო სახალისო და კომფორტული გადასაღები იყო.

შეგახსენებთ, რომ მეთიუ პერი 54 წლის ასაკში გარდაიცვალა. მსახიობი ლოს-ანჯელესში, საკუთარ სახლში, გარდაცვლილი იპოვეს, თუმცა ჯერჯერობით მისი გარდაცვალების მიზეზებზე ინფორმაცია ოფიციალურად არ დასტურდება. მსახიობი 3 ნოემბერს ლოს-ანჯელესში Forest Lawn-ის სასაფლაოზე დაკრძალეს.