ენმ-ის შეფასებით, რუსი ოკუპანტი სამხედროების მიერ, საქართველოს ოკუპირებულ ტერიტორიაზე საქართველოს მოქალაქის მკვლელობა და კიდევ ერთი მოქალაქის გატაცება, "ხელისუფლების მოღალატეობრივი, ოკუპაციასთან შემრიგებლური, კოლაბორაციონისტული" პოლიტიკის შედეგია.

  • "ამასთანავე, ოკუპაციის ხაზის გადმოწევის არ შემჩნევის პოლიტიკამ, 2012 წლის შემდეგ, დამატებით 12 მილიონი კვ.მ-ის ოკუპაცია მოიტანა", — წერია პარტიის განცხადებაში.

ნაციონალური მოძრაობა ასევე, აცხადებს, რომ:

  • არსებული მდგომარეობა არ გამოსწორდება მანამ, სანამ ხელისუფლების მხრიდან ოკუპანტთან და ოკუპაციასთან შემრიგებლური პოლიტიკა მიზანმიმართულად და შეგნებულად ხორციელდება,
  • "სწორედ ამიტომ, ჩვენი ქვეყნის ამ ვითარებიდან გამოსაყვანად გადასადგმელი ერთადერთი და აუცილებელი ნაბიჯი არსებული რეჟიმის მშვიდობიანი გზით ხელისუფლებიდან ჩამოცილებაა."
  • და იმისთვის, რომ საქართველო ოკუპანტ რუსეთთან მარტო და პირისპირ არ დარჩეს, აუცილებელია, სტრატეგიულ პარტნიორებთან — აშშ-სთან და ევროკავშირთან ჰქონდეს ბევრად უფრო მჭიდრო ურთიერთობა.

რა მოხდა: დღეს, 6 ნოემბერს, რუსმა ოკუპანტებმა, ოკუპირებულ ტერიტორიაზე სცადეს ადგილობრივი მაცხოვრებელი უკანონოდ დაეკავებინათ, რა დროსაც, მათ გასროლას საქართველოს მოქალაქე ემსხვერპლა.

  • გატაცებულია კიდევ ერთი მოქალაქე.
  • შემთხვევა დღეს მოხდა გორის მუნიციპალიტეტის სოფელ კირბალის მიმდებარედ, ოკუპირებულ ტერიტორიაზე.

ეს პრობლემა ფართო სურათში: საქართველოს ოკუპირებულ ტერიტორიებზე სისტემატურად ხდება:

  • ადამიანების გატაცება და უკანონო პატიმრობა;
  • განგრძობადი ბორდერიზაციით, არაერთმა ადგილობრივმა დაკარგა მიწა თუ სახლი, რომელიც ახალი ე.წ. "სასაზღვრო ნიშნების" აღმართვის შემდეგ, გამყოფი ხაზის მიღმა მიაქციეს ოკუპანტებმა;
  • მუდმივია დაშინებისა და შევიწროების შემთხვევები;
  • ხდება ეთნიკურად ქართველი მოსახლეობის მიზანმიმართული დისკრიმინაცია;
  • ადამიანებს უზღუდავენ მშობლიურ ენაზე განათლების მიღების უფლებას;
  • და ოკუპანტები ატარებენ რუსიფიკაციისა და მოსახლეობის ეთნიკური იდენტობის შეცვლის, მათი ასიმილაციისკენ მიმართულ პოლიტიკას.