ჩივნინგის სასტიპენდიო პროგრამაზე განაცხადების მიღების დასრულებამდე სულ 5 დღეა დარჩენილი. ჩივნინგის პროგრამის ფარგლებში, წელსაც საქართველოს ბანკი სამ გამარჯვებულს გამოავლენს, რომლებსაც სწავლასა და საცხოვრებელ ხარჯებს ბანკი სრულად დაუფინანსებს.

უკვე 10 წელია, რაც ფინანსური ინსტიტუტი ჩივნინგის სასტიპენდიო პროგრამის მხარდამჭერია და უკვე 26 ახალგაზრდას მისცა შესაძლებლობა, მიეღო განათლება დიდი ბრიტანეთის წამყვან უნივერსიტეტებში, ერთწლიან სამაგისტრო პროგრამაზე.

პროგრამაში ჩასართავად მხოლოდ აპლიკაციის შევსებაა საჭირო. ნებისმიერ შეკითხვაზე პასუხის მიღებას კი საქართველოს ბანკისა და LEAF-ის მიერ ორგანიზებულ საკონსულტაციო კურსზე არის შესაძლებელი.

თუმცა, თუ ჯერ კიდევ არ მიგიღია გადაწყვეტილება, მაშინ ჩვენ 5 მიზეზს გაგიზიარებთ, რომელიც გადაწყვეტილების მიღებაში დაგეხმარება:

1. სრული დაფინანსება

პროგრამის ფარგლებში საქართველოს ბანკი საკუთარ სტიპენდიატებს სწავლასა და ცხოვრების ხარჯებს სრულად უფინანსებს. ამასთან, სტუდენტს უფინანსდება მგზავრობის ხარჯები, ვიზის გადასახადი და იღებს გრანტს დისერტაციისთვის.

სრული დაფინანსება ეხმარება სტუდენტებს, მთლიანად კონცენტრირდნენ პროგრამის მიზნებზე და განათლებაზე.

2. კარიერული ზრდის უსაზღვრო შესაძლებლობა

ჩივნინგის პროგრამის შექმნის მიზანს, მსოფლიოში მცხოვრები ახალგაზრდებისთვის ხარისხიან უმაღლეს განათლებაზე ხელმისაწვდომობის ზრდა წარმოადგენდა. თუმცა, ახალგაზრდები ცოდნასთან ერთად დიდ გამოცდილებასაც იღებენ - სწავლობენ დამოუკიდებლად ცხოვრებას, ეცნობიან სწავლების განსხვავებულ მეთოდებს და იძენენ ახალ საერთაშორისო კავშირებს.

ჩივნინგის წარმატებაზე თავად სტიპენდიატების წარმატება მეტყველებს. მათ რიგებში არიან ცნობილი მწერლები, ჟურნალისტები, მოდის დიზაინერები, პოლიტიკოსები და ქვეყნის პრეზიდენტებიც კი.

3. პიროვნული განვითარების კატალიზატორი

გაცვლითი პროგრამა ეს არის საკუთარი თავის ახლიდან აღმოჩენის შესაძლებლობა. რადგან უცხო გარემოში მოხვედრილს, გიწევს კომფორტის ზონიდან გამოსვლა და ახალ გარემოსთან ადაპტაცია, რაშიც მხოლოდ შენი უნარები და შენი თავი თუ დაგეხმარება. სწორედ ამიტომ, ხშირად ამბობენ, რომ გაცვლითი პროგრამა არის შესაძლებლობა, აღმოაჩინო შენს თავში დამალული ნიჭი და ახალი ინტერესები. ეს კი დაგეხმარება, ჩამოყალიბდე უფრო მეტად თავდაჯერებულ, მიზანდასახულ და მეტად დამოუკიდებელ პიროვნებად.

4. მოგზაურობა და ახალი კულტურის გაცნობა

ჩივნინგის მიზანი სტუდენტებისთვის მხოლოდ წამყვან უნივერსიტეტებში განათლების მიღების შესაძლებლობის შექმნა არ არის. პროგრამა მოგზაურობის და ახალი კულტურის ახლოდან გაცნობის შესაძლებლობასაც გაძლევს.

5. სასარგებლო კავშირების დამყარება

სად უნდა დაამყარო სასარგებლო კავშირები, თუ არა მსოფლიოს წამყვან უნივერსიტეტებში? აქ ხომ მთელი მსოფლიოდან საუკეთესო „ტვინებია“ თავმოყრილი. შესაბამისად, შეიძლება ითქვას, რომ ჩივნინგის პროგრამის ფარგლებში შეძენილი მეგობრებიც დიდ წვლილს შეიტანენ შენს პიროვნულ თუ პროფესიულ ზრდაში.

Chevening-ის სასტიპენდიო პროგრამაზე აპლიკაციების მიღება 2023 წლის 7 ნოემბერს დასრულდება. მონაწილეობის მისაღებად ეწვიე ვებგვერდს — www.chevening.org/georgia/