რუსეთის მიერ ოკუპირებულ ქალაქ ვოლნოვახაში, რომელიც უკრაინის აღმოსავლეთით მდებარეობს, ოჯახის 9 წევრი მოკლული იპოვეს.

  • მათ შორის არის ორი ბავშვიც.

რას ამბობს გამოძიება: მომხდართან დაკავშირებით, გამოძიებას ატარებს როგორც უკრაინა, ასევე — რუსეთი.

  • უკრაინის ოფიციალური პირების თქმით, კაპკანეცები რუსმა ჯარისკაცებმა მას შემდეგ მოკლეს, რაც, 27 ოქტომბერს, ოჯახმა უარი თქვა მათთვის სახლის დათმობაზე.
  • უკრაინის ომბუდსმენის, დმიტრო ლუბინეცის განცხადებით, ვოლნოვახაში მომხდარ მკვლელობაში "რუსეთის სისხლიანი ხელი ურევია".
  • "პირველადი ინფორმაციით, ოკუპანტებმა მოკლეს კაპკანეცების მთელი ოჯახი, რომელიც დაბადების დღეს აღნიშნავდა. მათ უარი უთხრეს ოკუპანტებს ჩეჩნეთიდან, სახლი დაეთმოთ," - დაწერა ომბუდსმენმა ტელეგრამზე.
  • რუსი გამომძიებლების თქმით, დაკავებულია 2 ეჭვმიტანილი ჯარისკაცი.
  • ვოლნოვახა რუსებმა უკრაინაში სრულმასშტაბიანი შეჭრიდან რამდენიმე კვირაში დაიკავეს. ქალაქის დიდი ნაწილი დანგრეულია.

რა ხდება ფრონტის ხაზზე: უკრაინის აღმოსავლეთ და სამხრეთ რეგიონებში მძიმე ბრძოლებია. კიევმა კონტრშეტევა ივნისში დაიწყო, სცადა, სამხრეთ ხერსონსა და ზაპოროჟიაში მყოფი რუსული ჯარი ორად გაეყო და მათთვის მარაგის შევსება გაერთულებინა.

  • ბოლო კვირების განმავლობაში, რუსეთი თავდასხმას ახორციელებდა დონეცკის რეგიონში ქალაქ ავდიივკასთან, ასევე - ხარკივის რეგიონში კუპიანსკზე.
  • უკრაინის სამხედრო ძალების თქმით, მოსკოვის თავდასხმები წარუმატებელი იყო, რადგან მათ ავდიივკასთან დიდი დანაკარგები აქვთ.