The Notebook, რომელშიც მთავარ როლებს რეიჩელ მაკადამსი და რაიან გოსლინგი თამაშობენ, დღემდე ერთ-ერთი საკულტო მელოდრამაა. ახლახან ცნობილი გახდა, რომ ელის როლის თამაში ბრიტნი სპირსსაც სურდა. ბრიტნი როლის მისაღებად კასტინგზე მივიდა და ჟიურის გაოცებაც შეძლო.

The Notebook-ის პროდიუსერმა, მეთიუ ბარიმ, გაიხსენა, რომ მთავარი როლისთვის თავიდან ცნობილი მსახიობების შერჩევა დაიწყეს, თუმცა კასტინგზე ბრიტნის გამოჩენამ და მისმა შესრულებამ ყველა აღაფრთოვანა. "ბრიტნი უბრალოდ კარგი არ იყო, ის ფენომენალური იყო. ბრიტნიმ ყველა გაგვაოცა და ძალიან მძიმე გადაწყვეტილების წინაშე დაგვაყენა", — განაცხადა მეთიუ ბარიმ.

ინტერნეტში The Notebook-ის კასტინგზე მისული ბრიტნის ვიდეო გავრცელდა და მისი შესრულებით სოციალური ქსელების მომხმარებლებიც აღფრთოვანდნენ. ბრიტნიმ კი The Notebook-ის კასტინგი თავის მემუარებში, სახელად The Woman in Me, გაიხსენა.

"The Notebook-ის კასტინგზე გადაწყვეტილება ჩემსა და რეიჩელ მაკადამსს შორის უნდა მიეღოთ. მიუხედავად იმისა, რომ სახალისო იქნებოდა რაიან გოსლინგთან The All-New Mickey Mouse Club-ის შემდეგ კიდევ ერთხელ თამაში, მიხარია, რომ ასე არ მოხდა. როლზე რომ დავემტკიცებინე, ჩემს ალბომ In the Zone-ზე მუშაობის ნაცვლად, დღედაღამ იქ ვიქნებოდი", — წერს ბრიტნი.

შეგახსენებთ, რომ ბრიტნი სპირსის მემუარები, სახელად The Woman in Me, 24 ოქტომბერს გამოქვეყნდა. წიგნში მომღერალი ისეთ ისტორიებსა და გამოცდილებებს გვიზიარებს, რომლებიც საზოგადოებისთვის აქამდე ცნობილი არ იყო.