რა ხდება: სპეციალური საგამოძიებო სამსახური ამბობს, რომ 2023 წლის აგვისტო-ოქტომბრის პერიოდში, პირადი ცხოვრების საიდუმლოს ხელყოფის ფაქტებზე 14 პირი ამხილეს, მათგან 7 — დააკავეს.

დეტალები: საგამოძიებო, გავრცელებულ პრეს-რელიზში ზოგი ფაქტის შესახებ დეტალურად წერს. მაგალითად,

  • 1981 წელს დაბადებულმა, თბილისში მცხოვრებმა კაცმა ქალს, ვიდეოზარით საუბრისას, შიშველი სხეულის ჩვენება მოსთხოვა და მისი ნებართვის გარეშე, ფარულად გადაუღო ფოტოები და ვიდეო. მოგვიანებით, კაცმა აღნიშნული ინტიმური მასალა "ტიკტოკზე" განათავსა. მამაკაცი დააკავეს, ბრალდება პირადი ცხოვრების საიდუმლოს ხელყოფისთვის წარედგინა და მას 8 წლამდე პატიმრობა ემუქრება.
  • ასევე, სპეციალურმა საგამოძიებო სამსახურის ცნობით, დააკავეს 1992 წელს დაბადებული კაციც , რომელმაც, 2000 წელს დაბადებული ქალის "ფეისბუქის" ანგარიშში უნებართვოდ შეაღწია, მოიპოვა ინტიმური ფოტოები და ისინი ქალის მეგობრებსა და ნათესავებს გაუგზავნა და საჯაროდ განათავსა ფეისბუკზეც. გამოძიების ცნობით, მამაკაცი დააკავეს და მასაც 8 წლით თავისუფლების აღკვეთა ემუქრება.

უწყება აცხადებს, რომ დანაშაულში მხილებული დანარჩენი 12 პირი ნაცნობი ქალების ინტიმურ ფოტოებსა და ვიდეოებს მობილური ტელეფონებით და სოციალური ქსელებით მოიპოვებდნენ, შემდეგ კი დაზარალებულების ახლობლებს უგზავნიდნენ.

  • "საქართველოს მასშტაბით ბრალდებულების პირადი და საცხოვრებელი სახლების ჩხრეკისას, 300-ზე მეტი პირადი ცხოვრების ამსახველი ფოტო, ვიდეო და აუდიო ფაილი ამოვიღეთ და მასალას სასამართლოს მიერ განაჩენის გამოტანის შემდეგ გავანადგურებთ", — აცხადებენ საგამოძიებოში.