ამერიკულმა იურიდიულმა კომპანიამ Davis Polk & Wardwell უარი თქვა ჰარვარდისა და კოლუმბიის უნივერსიტეტების იმ სტუდენტების დასაქმებაზე, რომლებმაც ისრაელზე ჰამასის თავდასხმის შემდეგ ამ უკანასკნელის მხარდამჭერი განცხადებები გაავრცელეს.

კომპანიის წარმომადგენელი ამბობს, რომ განცხადებებში გამოთქმული შეხედულებები მათ ღირებულებათა სისტემას ეწინააღმდეგება.

"სწორედ ამ მიზეზით და იმისთვის, რომ კომპანიაში მეგობრული და ინკლუზიური სამუშაო გარემო შევინარჩუნოთ, ჩვენ აღარ მივიღებთ იმ სტუდენტებს, რომლებმაც განცხადებებს ხელი მოაწერეს. ამდენად, გაუქმებულია მათთვის შეთავაზებული წინადადებებიც", — ამბობს Davis Polk & Wardwell-ის წარმომადგენელი.

კომპანიის გადაწყვეტილების შედეგად, სამმა სტუდენტმა უკვე დაკარგა მათთან დასაქმების შესაძლებლობა.

8 ოქტომბერს, ჰამასის ისრაელზე თავდასხმიდან მეორე დღეს, ჰარვარდის რამდენიმე სტუდენტურმა გაერთიანებამ ერთობლივი განცხადება გაავრცელა და მომხდარზე "სრული პასუხისმგებლობა" ისრაელს დააკისრა. კოლუმბიის უნივერსიტეტის სტუდენტების მტკიცებით კი, თავდასხმა, რომელმაც 1 300-ზე მეტი უდანაშაულო ადამიანის სიცოცხლე შეიწირა, პალესტინელების საპასუხო დარტყმა იყო მათ "კოლონიალისტ მჩაგვრელზე".

განცხადებების გავრცელების შემდეგ, Davis Polk & Wardwell ერთადერთი კომპანია არ ყოფილა, რომელმაც ჰამასის მხარდამჭერ სტუდენტებთან ურთიერთობაზე უარი თქვა. სხვადასხვა კომპანიის აღმასრულებელმა დირექტორებმა და ინვესტორებმა ასევე მოითხოვეს, ჰარვარდს გაესაჯაროებინა ხელმომწერთა სია, რათა სამომავლოდ კომპანიებს ისინი არ დაესაქმებინათ.

"ტერორისტების ქმედებების მხარდაჭერისას, არავის არ უნდა შეეძლოს საერთო განცხადებებს ამოფარება", — განაცხადა ამერიკელმა მილიარდერმა ბილ აკმენმა.

გარდა ამისა, იურიდიულმა კომპანია Winston & Strawn-მა უარი თქვა ნიუ-იორკის უნივერსიტეტის იმ სტუდენტის დასაქმებაზე, რომელმაც ასევე ისრაელს დააკისრა პასუხისმგებლობა ჰამასის თავდასხმაზე.

განცხადებებზე საპასუხო რეაქციის შემდეგ, დასაქმების შესაძლებლობების დაკარგვის საშიშროების გამო, სულ მცირე ხუთმა სტუდენტმა თავისი ხელმოწერა უკან წაიღო.