მოკლედ: ისრაელის შეიარაღებული ძალების (IDF) მიერ გამართულ პრესკონფერენციაზე ცნობილი გახდა, რომ ისრაელს აქვს ჩანაწერი, სადაც ღაზის სექტორში მოქმედი პალესტინის ისლამური ჯიჰადის წევრები რაკეტის წარუმატებელ გასროლაზე საუბრობენ.

შეიარაღებული ძალების მტკიცებით,

  • ჩანაწერი ადასტურებს, რომ ქალაქ ღაზაში მდებარე ჰოსპიტალი თავად პალესტინელებმა დაბომბეს.
  • IDF-ის მტკიცებით, ჩანაწერის ავთენტურობა გადამოწმებულია.

რას ამბობენ ჩანაწერში: დიალოგში ორი პირი მონაწილეობს.

  • ისრაელის მიერ გავრცელებული თარგმანის მიხედვით, ერთ-ერთი მოსაუბრე ამბობს, რომ რაკეტა ვიღაცამ "საავადმყოფოს უკან მდებარე სასაფლაოდან ისროლა, გასროლა წარუმატებელი აღმოჩნდა და რაკეტა მათ დაეცა."

რა არის პალესტინის ისლამური ჯიჰადი (PIJ): ეს არის ღაზის სექტორში მოქმედი, სიდიდით მეორე სამხედრო დაჯგუფება, ჰამასის შემდეგ. ის მხარდაჭერილია ირანის მიერ.

  • PIJ-ს აქვს ისეთივე ისლამისტური იდეოლოგია, რაც ჰამასს, და მათი მიზანიც ისრაელის სახელმწიფოს განადგურებაა.
  • ხშირად, ამ დაჯგუფებას უფრო ექსტრემისტულად აღიქვამენ, ვიდრე ჰამასს.
  • ისლამური ჯიჰადი მოქმედებს ჰამასისგან დამოუკიდებლად, თუმცა ჰამასი, საჭიროების შემთხვევაში, მათ საქმიანობაში ჩარეულა.
  • PIJ-ს აქვს საკუთარი სამხედრო ფრთა, "ალ ყუდსის რაზმი" და საკუთარი სარაკეტო არსენალი.

რას ამბობენ ბრალდებაზე ღაზის სექტორში: პალესტინელები საავადმყოფოს აფეთქებაში მონაწილეობას უარყოფენ და ამტკიცებენ, რომ რაკეტა ისრაელმა ისროლა.

  • ჰამასის ლიდერი პასუხისმგებლობას აშშ-ს აკისრებს.
  • ღაზაში მდებარე ჰოსპიტლის აფეთქების შედეგად, 500-მდე ადამიანი დაიღუპა.