იაკოვ და ლიორა არგამენების ოჯახში 12 ოქტომბერი ყოველთვის განსაკუთრებულად აღინიშნებოდა. ეს თარიღი მათი შვილის, ნოას, დაბადების დღეა. თუმცა, წელს ნოას დაბადების დღე მის გარეშე გადაიხადეს. ახალგაზრდა ქალი ისრაელის სამხრეთით გამართულ ფესტივალზე თავდასხმისას ჰამასმა მძევლად აიყვანა. ნოას და მისი შეყვარებულის გატაცების ვიდეო ინტერნეტსივრცეშიც გავრცელდა.

12 ოქტომბერს ნოა 26 წლის გახდა. მის ოჯახში ამ დღის აღსანიშნავად გაშლილ სუფრაზე ორი ცარიელი ადგილი იყო: ერთი ნოასთვის, მეორე — მისი შეყვარებულისთვის, ავინათან ორისთვის.

ნოვას ფესტივალი, რომელიც ღაზის სექტორის მახლობლად, რე'იმის კიბუცში (ისრაელური დასახლების ტიპი) ტარდებოდა, 7 ოქტომბრის დილას ჰამასის თავდასხმის ერთ-ერთ პირველ სამიზნედ იქცა. ღონისძიების ზოგიერთმა სტუმარმა გაქცევა მოახერხა, მაგრამ ჰამასმა ნაწილი მძევლად აიყვანა, ნაწილი კი — დახოცა. ოფიციალური ცნობებით, ღონისძიების ტერიტორიაზე, სულ მცირე, 260 ადამიანის ცხედარია ნაპოვნი. დაღუპულებს შორისაა ნოას ახლო მეგობარიც.

იაკოვ და ლიორა არგამენებს იმედი აქვთ, რომ მათი შვილი ცოცხალია. გოგოს მშობლები იმედოვნებენ, რომ დაბადების დღის მილოცვა ნოამდე როგორღაც მაინც მიაღწევდა.

ნოას ამბავმა კი მსოფლიოში უამრავ ადამიანამდე მიაღწია, მათ შორის, მის საყვარელ მუსიკალურ ჯგუფამდე. ცნობილმა ისრაელურმა ბენდმა ლოლა მარშმა ინსტაგრამზე ვიდეოც გამოაქვეყნა და ნოას სიმღერა მიუძღვნა.

"ორი საათის წინ მივიღე შეტყობინება, რომ ჰამასის მიერ გატაცებული ნოა არგამანის საყვარელი ჯგუფი ლოლა მარში ყოფილა", — ტირილნარევი ხმით ამბობს ვიდეოში ჯგუფის სოლისტი, იაელ შოშანა კოენი, — "მისი საყვარელი სიმღერა კი She's a Rainbow არის.

"ამიტომ, ამ სიმღერას შენ გიძღვნი, ნოა. ვიცი, რომ მალე ცოცხლადაც გიმღერებ. ამის მართლა მჯერა. გაგიცნობ და მადლობას გადაგიხდი. ეს სიმღერა შენ, შენს ოჯახსა და მეგობრებს, რომლებიც ახლა ძალიან განიცდიან".

ნოას დედა კი, რომელიც ჩინეთიდანაა, თავისი ქვეყნის ლიდერს, სი ძინპინს, დახმარებას სთხოვს. 61 წლის ლიორა არგამანი კიბოს ებრძვის და ამბობს, რომ შვილის გატაცების ამბავმა ტკივილი გაუმძაფრა.

სხვათა შორის, ჩინეთს ჰამასის თავდასხმა ოფიციალურად არ დაუგმია. ამის გამო დასავლელი პოლიტიკოსებისგან კრიტიკაც დაიმსახურა. თუმცა, ქვეყნის საგარეო საქმეთა სამინისტრომ დაადასტურა, რომ ნოვას ფესტივალზე დახოცილ, დაშავებულ და გატაცებულ ადამიანებს შორის ჩინეთის მოქალაქეებიც არიან.

რა ხდება ისრაელში

7 ოქტომბერს, გამთენიისას, ღაზის სექტორიდან ისრაელის მიმართულებით რამდენიმე სარაკეტო თავდასხმა განხორციელდა. თავდასხმაზე პასუხისმგებლობა პალესტინურმა დაჯგუფება ჰამასმა აიღო, რომელსაც არაერთი ქვეყანა თუ გაერთიანება, მათ შორის ევროკავშირი და აშშ, ტერორისტულ ორგანიზაციად მიიჩნევს. მოულოდნელი შეტევა ბოლო ნახევარი საუკუნის განმავლობაში ისრაელზე ყველაზე მასშტაბური თავდასხმა იყო, მის სამიზნედ კი მშვიდობიანი ადამიანებიც იქცნენ. ადგილობრივი მედიის ცნობით, თავდასხმას ისრაელში, სულ მცირე, ათასი ადამიანის სიცოცხლე ემსხვერპლა.

• რა სიტუაციაა ისრაელსა და ღაზის სექტორში ჰამასის თავდასხმიდან 1 კვირის შემდეგ

თავდასხმის საპასუხოდ, ისრაელმა სამხედრო მობილიზაცია და საომარი მდგომარეობა გამოაცხადა. ქვეყნის პრემიერმინისტრმა ბენიამინ ნეთანიაჰუმ ისრაელის მოქალაქეებს წესრიგის დაცვისკენ მოუწოდა და პირობა დადო, რომ ქვეყანა "ამ ომში გაიმარჯვებს". ისრაელს სოლიდარობა და მხარდაჭერა გამოუცხადეს მსოფლიო ლიდერებმაც, მათ შორის, ევროკომისიის პრეზიდენტმა ურსულა ფონ დერ ლაიენმა, ევროპული საბჭოს პრეზიდენტმა შარლ მიშელმა, უკრაინის პრეზიდენტმა ვოლოდიმირ ზელენსკიმ, გაერთიანებული სამეფოს პრემიერმინისტრმა რიში სუნაკმა და აშშ-ის პრეზიდენტმა ჯო ბაიდენმა.