ერთიანი ნაციონალური მოძრაობის ერთ-ერთმა ლიდერმა, ნიკა მელიამ, დღეს, 8 ივნისს, ბოტანიკურ ბაღში ბრიფინგი გამართა, სადაც განაცხადა, რომ ბიძინა ივანიშვილი აღნიშნულ ტერიტორიაზე ჰიდროელექტროსადგურის აშენებას აპირებს, რომელიც მას და ტელეკომპანია GDS-ს ელექტროენერგიას მიაწოდებს:

"ნაკლებად წარმომედგინა, რომ ერთი თვის თავზე კიდევ მომიწევდა ბოტანიკურ ბაღში ბრიფინგის გამართვა, მაგრამ ახლანდელი რეალობა ბევრად უფრო მძიმეა, ვიდრე მაშინ იყო. რამდენიმე დღის წინ ჩაგვივარდა ხელთ დოკუმენტაცია, რომლის მიხედვითაც ივანიშვილი სხვა კომპანიის მეშვეობით გეგმავს დამატებითი ტერიტორიის მითვისებას ბოტანიკურ ბაღში. ამჯერად არამხოლოდ ნარმანიას ხელით, არამედ კალაძის აქტიური ჩარევით".

მელიას თქმით, მის ხელთ არსებული დოკუმენტაციის თანახმად, ენერგეტიკის სამინისტროსა და კომპანია წავკისის ველს შორის გაფორმდა მემორანდუმი, რომელიც ბოტანიკურ ბაღში ჰიდროელექტროსადგურის მშენებლობას ითვალისწინებს. მელია აცხადებს, რომ წავკისის ველის არაფორმალური მფლობელი ყოფილი პრემიერია:

"ეს იქნება ჰიდროელექტროსადგური თავისი კაშხლით და მისი მშენებლობის დასრულების შემდეგ ბატონ ბიძინა ივანიშვილს ექნება ელექტროენერგიის თავისი დამოუკიდებელი წყარო".

მელიამ ენერგეტიკის მინისტრსა და თბილისის მერს მოსთხოვა საზოგადოებისთვის აღნიშნულზე განმარტების გაკეთება.

"ამას არ დავუშვებთ, მაგრამ ფაქტია შემაშფოთებელი. 1 თვის წინ, როცა საზოგადოება 4 ჰექტარის მიტაცებას აპროტესტებდა, კალაძე და ივანიშვილი ახალ გეგმას სახავდნენ".

ნაციონალური მოძრაობის წევრის თქმით, ივანიშვილი აღნიშნულ პროექტს ახორციელებს, რათა მის სახლსა და ტელეკომპანია GDS-ს, რომლებიც მიმდებარე ტერიტორიაზეა განთავსებული, ენერგიის დამოუკიდებელი წყარო ჰქონდეს.