ჰილარი კლინტონი იქნება ამერიკის შეერთებული შტატების ისტორიაში პირველი ქალი, რომელიც საპრეზიდენტო არჩევნებში მიიღებს მონაწილეობას. მან უკვე იზეიმა 7 ივნისს გამართულ პრაიმერისში გამარჯვება.

წინასწარი მონაცემებით, აშშ-ს დემოკრატიული პარტიის პრეზიდენტობის კანდიდატებს შორის, ჰილარი კლინტონი უპირობო ლიდერია. მან დამაჯერებელი გამარჯვება მოიპოვა ყველა მსხვილ შტატ კალიფორნიაში. 7 ივნისს პრაიმერი სულ 6 შტატში გაიმართა. ჰილარი კლინტონი იგებს 58.8 პროცენტით იგებს კალიფორნიას, ბერნი სანდერსს კი ამ შტატში მხოლოდ 40 პროცენტამდე აქვს. ჯერჯერობით, კალიფორნიის პრაიმერის შედეგების მხოლოდ 47 პროცენტია დათვლილი, თუმცა, საბოლოო შედეგების დრამატული ცვლილება მოსალოდნელი არ არის. სწორედ კალიფორნიის პრაიმერისში მიღებული ხმებია კლინტონის ოფიციალურ კანდიდატად დასახელების გარანტი, რადგან ამ შტატში არის დელეგატების ყველაზე მეტი რაოდენობა, სულ 475. წინასწარი შედეგების მიხედვით, ბერნი სანდერსი 6 შტატიდან მხოლოდ ჩრდილოეთ დაკოტასა და მონტანაში იგებს, თუმცა, ეს კანდიდატად დასახელებისთვის საკმარისი არ არის. ჰილარი კლინტონს უკვე აქვს 2 497 დელეგატის ხმა, დემოკრატების საპრეზიდენტო კანდიდატად დასახელებისთვის კი 2 383 ხმა საკმარისია.

მიუხედავად იმისა, რომ ჰილარი კლინტონმა გამარჯვება უკვე იზეიმა, ბერნი სანდერსი დანებებას არ აპირებს და ამბობს, რომ ბრძოლა გრძელდება. მას ამ დროის მონაცემებით (თბილისის დროით დილის 11:04), 1 663 დელეგატის ხმა აქვს, ჯერ კიდევ ხელმისაწვდომია 605 დელეგატის ხმა და დასათვლელია კალიფორნიის პრაიმერის შედეგების დაახლოებით ნახევარი.

რაც შეეხება რესპუბლიკური პარტიის პრეზიდენტობის უკონკურენტო კანდიდატ დონალდ ტრამპს, მას კანდიდატობისთვის საკმარისი ხმები უკვე აქვს. მას ამისთვის 1 237 დელეგატი სჭირდებოდა, თუმცა ამ დრომდე 1 536 ხმა მოაგროვა. შესაბამისად, 2016 წლის ნოემბრის საპრეზიდენტო არჩევნებში ერთმანეთს ჰილარი კლინტონი და დონალდ ტრამპი დაუპირისპირდებიან.