მას შემდეგ, რაც რამდენიმე დღის წინ მსახიობი დენი მასტერსონი 2 ქალის გაუპატიურებაში დამნაშავედ ცნეს, მილა კუნისმა და ეშტონ კაჩერმა, რომლებიც მსახიობს აქამდე მხარს უჭერდნენ, მსხვერპლებისთვის მიყენებული ზიანისთვის ბოდიში მოიხადეს. მასტერსონის სასჯელი 30 წლიდან სამუდამო ვადამდე პატიმრობას ითვალისწინებს.

განაჩენის გამოტანამდე კოლეგების ნაწილი მსახიობის მიმართ ლმობიერ პოზიციას აფიქსირებდა, მათ შორის არიან მილა კუნისი და ეშტონ კაჩერიც. მსახიობები მასტერსონთან ერთად 1998 წელს გამოსულ ცნობილ სერიალ That 70's show-ში თამაშობდნენ. მათ მასტერსონს სასამართლოსთვის პიროვნების დადებითი დახასიათებაც კი დაუწერეს, რომელშიც კაჩერი ამბობს, რომ მისი აზრით, "დენი მასტერსონი საზოგადოებისთვის საშიშ პიროვნებას არ წარმოადგენს", კუნისი კი მსახიობს "მისაბაძ მაგალითსა და შესანიშნავ მეგობარს" უწოდებს.

ამის გამო საზოგადოებამ წყვილი მოძალადის მხარდაჭერის გამო გააკრიტიკა, რის პასუხად მათ სოციალურ ქსელში ვიდეო გაავრცელეს. კუნისისა და კაჩერის თქმით, მასტერსონის დახასიათებით არ უცდიათ, სასამართლო განაჩენში ეჭვი შეეტანათ და წერილები იმისთვის იყო განკუთვნილი, რომ მოსამართლეს მსახიობის პიროვნებაზე წარმოდგენა შეექმნა.

"ვაცნობიერებთ იმ ზიანს, რომელიც დენი მასტერსონისთვის დაწერილი დახასიათებით საზოგადოებას მივაყენეთ. ჩვენ მსხვერპლებს მხარს ვუჭერთ, ამას ვაკეთებდით წლების განმავლობაში და მომავალშიც ასე ვაპირებთ გაგრძელებას. რამდენიმე თვის წინ დენის ოჯახი დაგვიკავშირდა და გვთხოვა, რომ მისთვის დახასიათება დაგვეწერა, რომელიც იმ ადამიანს აღწერს, რომელსაც 25 წელია ვიცნობთ.
ამით არ გვინდოდა, მსხვერპლებისთვის ტკივილი მიგვეყენებინა ან მათ სიმართლეში შეგვეტანა ეჭვი და ვწუხვართ, თუ ასე მოხდა. სიყვარულს ვუგზავნით ყველა ადამიანს, რომელიც ოდესმე ყოფილა სექსუალური შევიწროების, ძალადობის ან გაუპატიურების მსხვერპლი", — აღნიშნავს წყვილი.

გავრცელებულ ვიდეოს კრიტიკის ტალღა მოჰყვა. მასტერსონის სექსუალური ძალადობის ერთ-ერთმა მსხვერპლმა ქალმა წყვილს მიმართა, თერაპიისკენ მოუწოდა და უთხრა, რომ "ისევე ავად არიან, როგორც მათი მისაბაძი მაგალითი".