ჩინეთში ორი ადამიანი მას შემდეგ დააკავეს, რაც ექსკავატორით ჩინეთის დიდი კედელი დააზიანეს. 38 წლის კაცმა და 55 წლის ქალმა, სამართალდამცავი ორგანოების განცხადებით, კედელი გზის შესამოკლებლად გაჭრეს, რათა მშენებლობამდე მარტივად მისულიყვნენ.

განცხადების მიხედვით, დაკავებულებმა კედელში უკვე არსებული გასასვლელი გააფართოვეს, რათა ექსკავატორით გაევლოთ. ჩინეთში აცხადებენ, რომ კედლის აღნიშნულ ნაწილს გამოუსწორებელი ზიანი მიადგა და საფრთხის ქვეშაა.

კედლის დაზიანების შესახებ შეტყობინება შესაბამისმა ორგანოებმა 24 აგვისტოს მიიღეს. ამ ეტაპზე გამოძიება მიმდინარეობს.

ჩინეთის კედელი 20 000 კილომეტრზეა გადაჭიმული და იუნესკომ 1987 წელს მსოფლიოს კულტურულ მემკვიდრეობის ძეგლად აღიარა. კედლის ყველაზე ძველი ნაწილები 2 000 წლის წინაა აშენებული, შემდეგ საუკუნეებში კი კედელს უფრო აფართოებდნენ. ზიანი კედლის იმ ნაწილს მიაყენეს, რომელიც XIV-XVII საუკუნეებით თარიღდება.