ქართული სპორტის პოპულარიზაციაში შეტანილი წვლილისთვის ზაზა ფაჩულია დაჯილდოვდა. ქართული დიასპორის წარმომადგენლების, განსაკუთრებული ღვაწლისთვის, დაჯილდოების ღონისძიება საქართველოს საგარეო საქმეთა სამინისტროს ორგანიზებით ჩატარდა.

"გარდა იმისა, რომ ზაზას ჩემპიონობა უდიდესი სპორტული გამარჯვებაა, მისი ტრიუმფი საქართველოს წარმატებაცაა. როცა ფინალური სერიის უკანასკნელი თამაში დასრულდა, ზაზამ NBA-ს ჩემპიონის თასი საქართველოს დროშასთან ერთად აღმართა. დარწმუნებული ვარ იმ წუთებში არა მარტო მე ვიყავი ძალიან ამაყი და ბედნიერი!" - აღნიშნა სპორტისა და ახალგაზრდობის საქმეთა მინისტრმა, ტარიელ ხეჩიკაშვილმა.

სპორტისა და ახალგაზრდობის საქმეთა სამინისტროს ინფორმაციით, ღონისძიების მიზანი, საზღვარგარეთ მცხოვრები თანამემამულეების დამსახურების აღიარებაა, რომლებმაც პროფესიულ წარმატებებს მიაღწიეს სხვა ქვეყნაში და წვლილი შეიტანეს საქართველოს განვითარებაში.