31 აგვისტოს მიხეილ მესხის სახელობის სტადიონზე ცნობილი ჯგუფის, Imagine Dragons-ის კონცერტი გაიმართა. კონცერტი კამპანია Starring Georgia-ს ფარგლებში ჩატარდა, რომლის თანაორგანიზატორი საქართველოს მთავრობაა.

უკრაინაში რუსეთის შეჭრის შემდეგ Imagine Dragons თითქმის ყველა კონცერტზე უცხადებს უკრაინას მხარდაჭერას, რასაც სცენაზე დროშის ატანით გამოხატავს. ჯგუფი UNITED24-ის ელჩია და კონცერტებზე სიმღერას Forever Young უკრაინას ხშირად უძღვნის.

ამ ყველაფრის ფონზე, მაყურებელთა ნაწილი გაკვირვებული დარჩა, რადგან ჯგუფს სცენაზე არც საქართველოს და არც უკრაინის დროშა არ აუფრიალებია. ჯგუფს კომენტარი არც უკრაინაში მიმდინარე მოვლენებზე გაუკეთებია და ქვეყანა არც Forever Young-ის სიმღერისას უხსენებიათ. არადა, ვენაში გამართულ კონცერტზე დენ რეინოლდსს ხელში უკრაინისა და საქართველოს დროშა ეჭირა.

რამდენიმე მომხმარებელი სოციალურ ქსელში წერს, რომ კონცერტზე დროშების შეტანაში ხელი შეუშალეს:

"მოკლედ, ჩვენი მთავრობის კიდევ ერთ ნაბიჯს, რუსებს რომ დისკომფორტი არ შეუქმნას, Imagine Dragons-ის კონცერტზე შესვლისას შევეჩეხე. ჩანთებს რომ ჩხრეკენ შესასვლელში, საქართველოს ეროვნული დროშა მედო, არ შეიძლებაო და ჩამორთმევის მცდელობა ჰქონდათ", — წერს ფეისბუქმომხმარებელი ნათი ხვადაგიანი.

"ყველამ კარგად წაიკითხეთ და გაავრცელეთ, დაცვის სამსახური #AlphaGreenSecurityService რომელიც Imagine Dragons-ის კონცერტის შიდა უსაფრთხოებას უზრუნველყოფს, მოვიდა ჩემთან და მოითხოვა უკრაინის დროშის შენახვა, დამალვა და საერთოდ არ გამოჩენა", — წერს ფეისბუქმომხმარებელი ქრისტინა ჯახუა.

მთავარმა არხმა სიუჟეტში ვიდეოც გაავრცელა, რომელშიც ჩანს, რომ მსმენელს კონცერტზე უკრაინის დროშის შეტანის გამო დაცვის წევრებთან უთანხმოება მოუვიდა.

დროშების შესახებ კონცერტის ორგანიზატორებს ოფიციალური კომენტარი ჯერჯერობით არ გაუკეთებიათ.