რატომ არის მნიშვნელოვანი: 16-17 აგვისტოს საქართველოში უკრაინის 6 მოქალაქე არ შემოუშვეს — ისინი ლარსის საბაჟო გამშვები პუნქტის ნეიტრალურ ზონაში იმყოფებოდნენ.

  • ნოვაია გაზეტას ცნობით, 5 მათგანი ყოფილი პატიმარია, რომლებიც რუსმა სამხედროებმა ხერსონიდან იძულებით წაიყვანეს.
  • მედიის ინფორმაციით, უკრაინის მოქალაქეებს საზღვრის კვეთაზე უარი "სხვა მიზეზებით" ეთქვათ.
  • გამოცემა წერდა, რომ, სანამ ქვეყანაში შემოშვების თხოვნით უფლებადამცველები ყველა შესაძლო ინსტანციას მიმართავდნენ, რუსეთის უსაფრთხოების ძალები უკრაინელების გატაცებას ცდილობდნენ.
  • "ყოფილ პატიმრებს შორის ერთი აივ დადებითია. მას უკვე ოთხი დღეა წამლები დაუმთავრდა. მისი ფიზიკური და ფსიქიკური მდგომარეობა ყოველდღიურად შესამჩნევად უარესდება", — ნათქვამი იყო სტატიაში.

საგარეო საქმეთა სამინისტროში განაცხადეს, რომ მედიაში არაობიექტური და უსაფუძვლო ბრალდებები გავრცელდა.

  • მათი თქმით, უკრაინის მოქალაქეებთან დაკავშირებით, ქართულმა მხარემ მყისიერად გამართა შეხვედრა უკრაინის საქმეთა დროებით რწმუნებულთან და უკრაინის ოფიციალურ პასუხს ელოდებოდა.

დეტალები: საგარეოს განცხადებით, მას შემდეგ, რაც უკრაინის ერთ-ერთი მოქალაქის ჯანმრთელობის მდგომარეობა გართულდა, მათი ქვეყანაში შემოშვების გადაწყვეტილება მიიღეს.

  • "ქართულმა მხარემ მიიღო გადაწყვეტილება მათი საქართველოს ტერიტორიაზე შემოშვების შესახებ, რომლებიც უკვე აქ დაელოდებიან შესაბამისი პროცედურების დასრულებას", — ამბობენ უწყებაში.