რატომ არის მნიშვნელოვანი: ნოვაია გაზეტას ცნობით, 16-17 აგვისტოს საქართველოში უკრაინის 6 მოქალაქე არ შემოუშვეს.

  • გამოცემის თანახმად, ისინი ყოფილი პატიმრები არიან, რომლებიც რუსმა სამხედროებმა ხერსონიდან იძულებით წაიყვანეს.
  • მედია წერს, რომ უკრაინის მოქალაქეებს საზღვრის კვეთაზე უარი "სხვა მიზეზებით" ეთქვათ.
  • ნოვაია გაზეტას ინფორმაციით, სანამ ქვეყანაში შემოშვების თხოვნით უფლებადამცველები ყველა შესაძლო ინსტანციას მიმართავენ, რუსეთის უსაფრთხოების ძალები უკრაინელების გატაცებას ცდილობენ.
  • უფლებადამცველი ორგანიზაციის, Unmode-ის ხელმძღვანელის თქმით, 6 პირი ამჟამად ლარსის საბაჟო გამშვები პუნქტის ნეიტრალურ ზონაში იმყოფება.
  • "ყოფილ პატიმრებს შორის ერთი აივ დადებითია. მას უკვე ოთხი დღეა წამლები დაუმთავრდა. მისი ფიზიკური და ფსიქიკური მდგომარეობა ყოველდღიურად შესამჩნევად უარესდება", — წერს გამოცემა.

დეტალები: საგარეო საქმეთა სამინისტროს განცხადებით, მედიაში არაობიექტური და უსაფუძვლო ბრალდებები გავრცელდა.

  • მათი თქმით, უკრაინის მოქალაქეებთან დაკავშირებით, ქართულმა მხარემ მყისიერად გამართა შეხვედრა უკრაინის საქმეთა დროებით რწმუნებულთან, ოლექსანდრ შულჰასთან.
  • "ქართულმა მხარემ შესთავაზა უკრაინის დიპლომატიურ მისიას დახმარება მოქალაქეების უკრაინაში გადაყვანასთან დაკავშირებით. უკრაინის დროებითმა რწმუნებულმა მადლობა გადაუხადა ქართულ მხარეს მიწოდებული ინფორმაციისა და თანადგომისთვის. მისი განცხადებით, საქართველოს საზღვართან მყოფი პირები, რომლებიც სასჯელს იხდიდნენ საპატიმრო დაწესებულებაში, ფლობენ უკრაინის შიდა პასპორტებს, თუმცა საჭიროა მათი იდენტიფიცირება და უკრაინის შესაბამისი უწყებებიდან ნებართვების აღება, რასაც სჭირდება დამატებითი დრო", — ნათქვამია განცხადებაში.
  • სამინისტროში ამბობენ, რომ უკრაინელი დიპლომატი კიევიდან მითითებებს ელოდება.