17-24 აგვისტოს, ალტე უნივერსიტეტის ორგანიზებით, Technovation Girls Sakartvelo 2023-ის მონაწილე გოგოებისთვის, კაჭრეთში, კოლეჯ აისში, ტექნოლოგიური ბანაკი ჩატარდა. 17-20 აგვისტოს, ბანაკს სტუმრობდნენ ჯუნიორ კატეგორიის მონაწილეები, ხოლო, 21-24 აგვისტოს, აქტივობები გაიმართა სენიორ კატეგორიის მონაწილეებისთვის. საერთო ჯამში, ბანაკში მონაწილეობა მიიღო 150-მა გოგომ და 40-მა მენტორმა საქართველოს სხვადასხვა რეგიონიდან. მათ მოისმინეს ალტე უნივერსიტეტის პროფესორებისა და პარტნიორი კომპანიების წარმომადგენლების მიერ ჩატარებული საინტერესო ლექციები კლიმატის, სამედიცინო და აგროტექნოლოგიების შესახებ. ასევე, გაიარეს ელექტრონიკის, პროგრამირებისა და ხელოვნური ინტელექტის ვორქშოფები და მონაწილეობა მიიიღეს სახალისო STEM თამაშებში.

ფოტო: ალტე უნივერსიტეტი

შეგახსენებთ, რომ Technovation Girls საერთაშორისო პროექტია, რომელშიც უკვე 17 წელია, მსოფლიოს ასზე მეტი ქვეყნის ათიათასობით გოგო იღებს მონაწილეობას და გულისხმობს მათ მომზადებას პროგრამირებასა და მეწარმეობაში, კონკრეტული პრობლემების გადაჭრის ტექნოლოგიური გზის საპოვნელად. 2022-2023 წელს პროგრამა საქართველოში ხორციელდება ალტე უნივერსიტეტის მხარდაჭერით, პარტნიორ ორგანიზაციებთან თანამშრომლობით: TBC — თიბისი, GITA • Tech Park, ახალგაზრდული ინოვაციების ცენტრი, Idea Design Group, Edutech, Skillwill • სქილვილ, Usaid, Edison Tech Solutions, HT Solutions, პროფესიული უნარების სააგენტო • Skills Agency Georgia, Forbes Woman Georgia, Majorel Georgia.

წელს პროგრამის ფარგლებში ტექნოლოგიური პროექტები შექმნა 249 გოგომ.

ფოტო: ალტე უნივერსიტეტი

საქართველომ დასრულებული პროექტების რაოდენობით, მსოფლიო მასშტაბით მე-10 ადგილი დაიკავა. აღსანიშნავია ის ფაქტიც, რომ საქართველოდან წარდგენილი ფარისა და ცაგერის საჯარო სკოლების გოგოებისგან შემდგარი გუნდი — TSFE Technical Support for Earth, პროექტით: Smart Light, წელს პირველად გახდა ევროპის რეგიონის გამარჯვებული.