რა მოხდა: სურსათის ეროვნულმა სააგენტომ ნიკორას მზა კერძების საწარმოო პროცესი შეუჩერა.

  • სააგენტოს ცნობით, დაავადებათა კონტროლისა და და თბილისის გადამდებ დაავადებათა ეპიდზედამხედველობის ცენტრიდან 8 ადამიანის საკვებით ინტოქსიკაციაზე შეტყობინება მიიღეს — მათ სალმონელოზი დაუდასტურდათ.
  • ეპიდემიოლოგიური კვლევის თანახმად, პაციენტებმა საკვებად ნიკორას სასურსათო მაღაზიებში შეძენილი კოტლეტი კიევური მიიღეს.
  • "სააგენტოს ინსპექტორებმა ლაბორატორიული კვლევისთვის აიღეს სურსათის ნიმუშები, რომლებშიც პათოგენური მიკროორგანიზმი სალმონელა აღმოჩნდა. შედეგად ნიკორა ტრეიდის მზა კერძების წარმოება დაჯარიმდა და კრიტიკული შეუსაბამობების აღმოფხვრამდე, საწარმოო პროცესი შეუჩერდა", — აცხადებენ სააგენტოში.
  • მათივე თქმით, პათოგენით დაბინძურებული 20 კგ ქათმის ფილე, 100 კგ სხვადასხვა სახეობის სურსათისა და 22 კგ კოტლეტი კიევურის ფარში განადგურდება.

ნიკორას განცხადებით, მზა კერძების საწარმოო პროცესის შეჩერების მიზეზი კომპანია ჯეო დისტრიბუციის ქათმის ფილე გრაკო გახდა.

  • "ინფორმაციის მიღებისთანავე ჩვენი მხრიდან მყისიერად მოხდა სააგენტოს ყველა მითითების შესრულება, მათთან აქტიური თანამშრომლობით გამოვავლინეთ, სად იყო მიზეზი და მივაკვლიეთ ქათმის ფილე გრაკოს, რომელიც გამოიყენებოდა კოტლეტის წარმოებაში, ხოლო ამ უკანასკნელით გვამარაგებდა კომპანია ჯეო დისტრიბუცია", — ვკითხულობთ განცხადებაში.
  • მათივე თქმით, ქათმის ფილეს აღნიშნული პარტია მოხმარებიდან მოხსნეს.