შოვის სტიქიისას ერთ-ერთი დაღუპული სოფო ბაკურაძეა, რომელიც კოტეჯებში დამლაგებლად მუშაობდა. 23 წლის სოფო მარტოხელა დედა იყო, რომელსაც 4 წლის შვილი — ლუსი დარჩა. სოფოს გარდაცვალების შემდეგ სოციალურ ქსელებში ლუსის დასახმარებლად თანხის შეგროვება დაიწყეს, საბოლოოდ კი ისე მოხდა, რომ 4 წლის გოგოს ხალხმა ბინის საყიდელი ფული შეუგროვა.

"23 წლის იყო ჩემი და. ამ ასაკში იწყებს ხალხი ცხოვრებას. მხოლოდ ბავშვი დატოვა, სამი წელიც ვერ მოასწრო მასთან ყოფნა.ხატვა უყვარდა. სკოლის მერე სამხატვრო აკადემიაში უნდოდა ჩაბარება, მაგრამ ბოლო გამოცდაზე დააგვიანდა და ის წელი გაუცდა. შემდეგ გათხოვდა, ბავშვი გააჩინა და ვეღარ მოახერხა", — ჰყვება სოფოს ძმა გიორგი რადიო თავისუფლებასთან ინტერვიუში.

პატარა ლუსიმ ჯერ კიდევ არ იცის, რომ დედა გარდაეცვალა. ახლობლებმა ლუსი არც დედის დაკრძალვას დაასწრეს. სოფოს მშობლები და ორი ძმა სოფელ გლოლაში ცხოვრობენ, 4 წლის ლუსიზე კი მეურვეობას ოჯახი აიღებს.

ლუსის დასახმარებლად თანხის შეგროვება ორმა არასამთავრობო ორგანიზაციამ, რაჭის ახალგაზრდული ასამბლეამ და რაჭა-ლეჩხუმისა და ქვემო სვანეთის თვითმმართველობის რესურს ცენტრმა, წამოიწყო. თავიდან მიზანი ის იყო, რომ ლუსისთვის მცირე თანხა შეეგროვებინათ, თუმცა ხალხს სურდა, რომ ლუსის უკეთ ეცხოვრა და შეგროვილი თანხა ბინის ყიდვისთვისაც კი საკმარისი აღმოჩნდა.

"უკვე შევარჩიეთ სტუდიო ბინა დიდ დიღომში. გარემონტებული ბინაა. რომ გაიგეს, რისთვის გვინდოდა, კომპანიის წარმომადგენელი დაგვპირდა, ჩვენ მოგიწყობთო. ეს ბინა სოფოს დედის სახელზე გაფორმდება", — ამბობს ნანა სოხაძე, რაჭა-ლეჩხუმისა და ქვემო სვანეთის თვითმმართველობის რესურს ცენტრის ხელმძღვანელი რადიო თავისუფლებასთან ინტერვიუში.

სოფო ბაკურაძე სოფელ გლოლაში 15 აგვისტოს დაკრძალეს.