5 მაისს, პოლიტიკური პარტია გირჩი C.T.Park-ის წინააღმდეგ გამოვიდა და ხელისუფლებას საქართველოს კანონმდებლობაში 2 დებულების შეცვლა შესთავაზა:

  • 150 ლარის ნაცვლად, საურავი გახდეს 20 ლარი ან ნული, რათა გირჩის თქმით, სითი პარკს არ ჰქონდეს მოტივაცია, კანონმდებლობის დარღვევით აბაროს საჯარიმო ქვითრები არა სამართალდამრღვევ, არამედ სხვა ადამიანებს;
  • არასათანადო ადგილას გაჩერებული ავტომანქანის დაცულ სადგომზე გადაყვანის უფლება სითი პარკს ჰქონდეს არა თვითნებურად და მხოლოდ მას შემდეგ, რაც საპატრულო პოლიცია შეადგენს ოქმს, რომ სატრანსპორტო საშუალება აფერხებს მოძრაობას, ქმნის საავარიო ვითარებას ან საცობს.

ხუთშაბათს, 29 ივნისს, რეგიონული პოლიტიკისა და თვითმმართველობის კომიტეტმა გირჩის საკანონმდებლო წინადადება საქართველოს ადმინისტრაციულ სამართალდარღვევათა კოდექსში ცვლილების შეტანის თაობაზე განიხილა და აღნიშნულ საკითხზე სამუშაო ჯგუფის შექმნას მხარი დაუჭირა.

კომიტეტის თავმჯდომარე გრიგოლ ლილუაშვილის განცხადებით, კომიტეტი პრინციპების დონეზე იზიარებს ამ საკითხის დარეგულირების აუცილებლობას და მუშა ჯგუფის შექმნის იდეას, რის შესახებაც დასკვნა აღნიშნულ საკითხზე წამყვან კომიტეტს - იურიდიულ საკითხთა კომიტეტს გადაეცემა.