ამის შესახებ პარტიის ლიდერებმა 20 ივლისს გამართულ პრეზენტაციაზე განაცხადეს.

ახალი პოლიტიკური ალიანსის სახელი გამარჯვების პლატფორმა იქნება.

  • ენმ-ის თავმჯდომარის, ლევან ხაბეიშვილის თქმით, საზოგადოებრივი აზრის კვლევებმა და ხალხთან შეხვედრებმა დაარწმუნა, რომ ქართულ ოცნებას მხოლოდ ერთობა დაამარცხებს.
  • "მივიღეთ გადაწყვეტილება, ნაციონალური მოძრაობის პროდასავლური პარტიების პლატფორმაზე გაკეთდეს გამარჯვების პლატფორმა და ამასობაში კონკრეტული კონსულტაციების შემდეგ მივაღწიეთ შეთანხმებას პარტიასთან, რომელიც, ასევე, ყველაზე დიდია ყველა კვლევით პროდასავლური პარტიებს შორის. ვგულისხმობ სტრატეგია აღმაშენებელს", — განაცხადა ხაბეიშვილმა.
  • მისივე თქმით, ალიანსს ექნება საერთო სტრატეგია "რუსული პარტიისა" და ბიძინა ივანიშვილის დასამარცხებლად.

სტრატეგია აღმაშენებლის ლიდერი, გიორგი ვაშაძე ამბობს, რომ ალიანსში გულანთებული, სამშობლოზე შეყვარებული პატრიოტები შეიკრიბნენ.

  • "სტრატეგია აღმაშენებელი, ნაციონალური მოძრაობასთან, მიხეილ სააკაშვილის პარტიასთან და ყველა თაობის პატრიოტ, პროფესიონალ ადამიანებთან ერთად ვიწყებთ გამარჯვების, ცვლილებებისა და ივანიშვილის რუსული რეჟიმისგან გათავისუფლების მოძრაობას, ვქმნით გამარჯვების პლატფორმას, რომელსაც წლებია, ელოდება საქართველოს მოქალაქეები", — განაცხადა ვაშაძემ.
  • მისი თქმით, პოლიტიკური პლატფორმის მთავარი საზრუნავი ხალხის პრობლემების მოგვარება, ნატოსა და ევროკავშირში საქართველოს გაწევრიანების დაჩქარება, დეოკუპაცია და ტერიტორიული მთლიანობის აღდგენა იქნება.
  • ვაშაძე ამბობს, რომ გამარჯვების პლატფორმა არ იქნება მხოლოდ პარტიათა გაერთიანება და მასში გაწევრიანებისკენ სხვებსაც მოუწოდებს.
  • "ეს არის ზეპარტიული პლატფორმა, რომლის მიზანიც არის ყველა პატრიოტი, პატიოსანი და პროფესიონალი ადამიანი ჩაერთოს ქვეყნის აღმშენებლობის პროცესში. სწორედ ამიტომ, ვინც მხარს უჭერთ ერთიან, ძლიერ და რეგიონის ლიდერი საქართველოს იდეას და არ აპირებთ შეეგუოთ საქართველოს რუსულ ჭაობში ჩატოვებას, [...] გავერთიანდეთ საქართველოს გამარჯვების და საქართველოს ძლიერების ამ ახალ პლატფორმაში", — თქვა მან.