საგარეო საქმეთა მინისტრს ილია დარჩიაშვილსა და პოლონეთის ელჩის მოვალეობის შემსრულებლის მარიუშ პიეტრ ჟაკის შეხვედრის შემდეგ უწყებამ განცხადება გაავრცელა.

რა მოხდა: 14 ივლისს, კლინიკა ვივამედში ექსპრეზიდენტის მოსანახულებლად პოლონელი ექიმები შევიდნენ.

• ამავე დღის ბოლოს პენიტენციურმა სამსახურმა გაავრცელა განცხადება, რომ ვიზიტისას ერთ-ერთი პოლონელი ექიმის მხრიდან "გაუგებარი ინციდენტი" დაფიქსირდა.
• უწყებაში ამბობდნენ, რომ ექიმმა მიხეილ სააკაშვილისგან აღებული ნიმუში ქაღალდში გადაახვია და მის მალულად გატანას ფეხსაცმლის მეშვეობით ცდილობდა.
• "აღსანიშნავია, რომ ოფიციალური წესით აღებული ნიმუშის გატანის უფლება მათ მისცა თავად სამსახურმა, შესაბამისად, აღნიშნული ქმედება ექიმის მხრიდან სამედიცინო ეთიკურ და სამართლებრივ ნორმებთან შეუსაბამო საქციელს კიდევ უფრო მეტად ჰმატებს ბუნდოვანებას. ამ პიროვნებას ჩამოერთვა ახსნა-განმარტება, რომელიც ვერ ექვემდებარება ლოგიკურ ახსნას", — აცხადებდნენ პენიტენციურში.
• მათვე გამოაქვეყნეს მომხდარის ამსახველი ვიდეო მასალა.

ვივამედის კლინიკური დირექტორი, ნინო ნადირაძე ფეისბუქზე წერდა:

• "წინდებით და ფეხსაცმელებით გამოტანილი მასალა აიღეს მოწმეების გარეშე. რად უნდოდათ, სამეცნიერო თუ ოკულტური მიზნებისთვის, ვერ გეტყვით".
• კომენტარში კი განმარტა, როგორ ახსნა პოლონელმა ექიმმა მომხდარი:
• "ყველაფერს წინდებში ვინახავო, ჯიბეები არ მიყვარსო, ასე თქვა, ოღონდ მართლა", — ამბობდა ნადირაძე.

იუსტიციის მინისტრმა, რატი ბრეგაძემ საგარეო საქმეთა სამინისტროს მიმართა თხოვნით, მოისმინოს პოლონეთის საელჩოს პოზიცია, რადგან სწორედ ის იყო ექიმების ერთ-ერთი რეკომენდატორი.

• ბრეგაძის თქმით, გაუგებარია, რა იყო ასეთი "არაეთიკური ქმედების" მიზანი, მაშინ, როცა მედიკოსებს ოფიციალური წესით აღებული ნიმუშის გატანის უფლება ისედაც ჰქონდათ.
• "ყველამ პატივი უნდა ვცეთ ჩვენი ქვეყნის სუვერენიტეტს, რაოდენ დიდი გაერთიანებაც უნდა შედგეს, რომელიც არ ეფუძნება მტკიცებულებებს და რომლის უკანაც არ დგას ლოგიკა, ჩვენ ვერავის აზრს ვერ გავითვალისწინებთ, ჩვენ ვიმოქმედებთ მკაცრად კანონმდებლობის ფარგლებში", — აცხადებდა ბრეგაძე.

სამინისტროში ამბობენ, რომ ქართულმა მხარემ დააფიქსირა შეშფოთება ინციდენტის გამო და პოლონელ დიპლომატს განემარტა, რომ სახელმწიფო დაინტერესებულია, საზოგადოებას ჰქონდეს სრული ინფორმაცია სააკაშვილის ჯანმრთელობაზე.

• "შესაბამისად, არაერთხელ გამოხატა მზადყოფნა ოჯახის სურვილის შემთხვევაში კლინიკაში უცხოელი ექიმების დაშვების თაობაზე, რისი დასტურიცაა პოლონელი ექიმების ვიზიტი მსჯავრდებულ სააკაშვილთან ოჯახის შუამდგომლობითა და პოლონეთის საელჩოს მხარდაჭერით, მიუხედავად იმისა, რომ სტრასბურგის ადამიანის უფლებათა სასამართლოს გადაწყვეტილებით მსჯავრდებულ სააკაშვილს უარი ეთქვა პოლონეთში სამკურნალოდ გადაყვანაზე".
• მათივე თქმით, ხაზი გაუსვეს, რომ პოლონელ მედიკოსთა მისიაში შემავალი ერთ-ერთი ექიმის საქციელი "იწვევს გაუგებრობას, შეშფოთებას და სანდოობას უკარგავს პროცესს".
• "საგარეო საქმეთა სამინისტროში პოლონელ დიპლომატს ეთხოვა მომხდარზე პოზიციის დაფიქსირება".
• როგორც უწყებაში აცხადებენ, შეხვედრაზე პოლონელმა დიპლომატმა აღნიშნა, რომ არ არის ინფორმირებული თუ რამ გამოიწვია პოლონელი ექიმის მსგავსი საქციელი.