დუბაიში ტიკტოკერი ვიდეოსთვის დაიჭირეს, რომელშიც ის არაბი მდიდარი კაცის პაროდიას აკეთებდა.

არაბთა გაერთიანებულ საამიროში, შუა აღმოსავლეთის სხვა ქვეყნებთან შედარებით, უფრო ნაკლები აკრძალვა მოქმედებს, თუმცა სიტყვისა და გამოხატვის თავისუფლება აქაც შეზღუდულია. მაგალითად, 2022 წლის იანვარში ქვეყანაში მიიღეს ახალი კანონი კიბერდანაშაულის შესახებ, რომელიც ინტერნეტში ნებისმიერ ხელისუფლების მიმართ ოპოზიციური შინაარსის კონტენტს კრძალავს. კანონის ცვლილება ან გაუქმება თხუთმეტამდე უფლებადამცველმა ორგანიზაციამ მოითხოვა.

კანონის მიღების შემდეგ, ამ მუხლით ხელისუფლებამ თხუთმეტამდე ადამიანი დააკავა, მათ შორის, ერთ-ერთს 5 წლით პატიმრობა და $136 ათასი რაოდენობის ჯარიმა დააკისრა.

ტიკტოკერი ჰამდან ალ-რინდიც სწორედ ამ კანონის დარღვევისთვის დააკავეს. სოციალურ ქსელში გამოქვეყნებულ ვიდეოში იგი განასახიერებს არაბ მილიონერს, რომელიც თავისი ოთხი ცოლისთვის მდიდრულ მანქანებს ყიდულობს.

პროკურატურის თქმით, კაცს ბრალად "ინტერნეტის ბოროტად გამოყენება და პროპაგანდისტული ვიდეოს გავრცელება ედება, რომელიც საზოგადოებრივ აზრს აზიანებს, ქვეყანაზე არასწორ წარმოდგენას ქმნის და საამიროების მოსახლეობას შეურაცხყოფას აყენებს".