თბილისის სააპელაციო სასამართლომ ძალადობაში ბრალდებულ ჩოგბურთელზე პირველი ინსტანციის გადაწყვეტილება ძალაში დატოვა და ის უდანაშაულოდ ცნო.

რატომ არის მნიშვნელოვანი: ჩოგბურთელი ნიკოლოზ ბასილაშვილი პოლიციამ ყოფილ ცოლზე ძალადობის ბრალდებით 2020 წლის მაისში დააკავა.

  • სასამართლომ მას აღკვეთი ღონისძიების სახით 100 000-ლარიანი გირაო შეუფარდა და გაათავისუფლა.
  • ბრალდების მხარე ნიკოლოზ ბასილაშვილს დაზარალებულის მიმართ ფიზიკური ძალადობის 4 ეპიზოდს ედავებოდა.
  • მათ შორის, იყო ფსიქოლოგიური, ფიზიკური და ეკონომიკური ძალადობის საქმეები.
  • 21 ოქტომბერს სასამართლომ ის ყველა ნაწილში გაამართლა.
  • ასევე, გააუქმა თბილისის საქალაქო სასამართლოს 2020 წლის 24 მაისის განჩინებით ბასილაშვილის მიმართ აღკვეთის ღონისძიება გირაო.
  • პროკურატურამ გადაწყვეტილება სააპელაციოში გაასაჩივრა.

რა ხდებოდა წინა პროცესზე: ბასილაშვილი წარდგენილ ბრალს არ ეთანხმებოდა, თავს სრულად უდანაშაულოდ მიიჩნევდა და დეტალებზე საჯაროდ არ საუბრობდა.

  • 21 ოქტომბერს ბოლო სხდომაზე იყო მოლოდინი, რომ საზოგადოება ბასილაშვილის საბოლოო სიტყვას მოისმენდა, თუმცა მან სხდომის დახურვა მოითხოვა.
  • ნელი დოროყაშვილის ადვოკატები ამბობდნენ, 20 ოქტომბერს, შესვენებისას სხდომათა დარბაზში სასამართლოს თანამშრომლებმა ფოტოები გადაიღეს.
  • აღნიშნავდნენ, რომ თანამშრომლების მხრიდან მსგავსი ქცევა არაეთიკურია — "დაზარალებულისთვის ასეთი გარემოება, როდესაც სასამართლოსგან ელოდება ობიექტურ, მიუკერძოებელ გადაწყვეტილებას და ხედავს, რომ ამ სასამართლოს თანამშრომლები ფოტოებს იღებენ ბრალდებულთან, ეს მინიმუმ, უნდობლობის განცდას აჩენს".
  • მოსამართლე კი ამაში პრობლემას ვერ ხედავდა და ამბობდა, რომ "საბედნიეროდ გადაწყვეტილებას მოსამართლე იღებს და არა თანამშრომლები, მდივნები, თანაშემწეები".

სტრიქონებს შორის: მთავრობა და ქართული ოცნება 2021 წელს, როდესაც ბასილაშვილს უკვე ედავებოდნენ ოჯახში ძალადობას, ასპონსორებდნენ პოსტებს, რომლითაც ჩოგბურთელს გამარჯვებას ულოცავდნენ.

  • ბრალდებული ბასილაშვილი ქართულმა ოცნებამ წინასაარჩევნო კამპანიაშიც ჩართო — 29 ოქტომბერს პარტიამ Facebook-ზე გამოაქვეყნა ვიდეო, სადაც ჩოგბურთელმა კახა კალაძეს მხარდაჭერა გამოუცხადა.