დღეს აზერბაიჯანის სააპელაციო სასამართლომ საქართველოდან გატაცებული ჟურნალისტის, აფგან მუხტარლის, ციხეში პატიმრობიდან გათავისუფლებასა და შინაპატიმრობაზე უარი უთხრა. ამის შესახებ ინფორმაციას აფგან მუხტარლის ცოლი, ლეილა მუსტაფაევა, ავრცელებს.

მუსტაფაევას თქმით, მუხტარლის ადვოკატი ამბობს, რომ დაპატიმრებული ჟურნალისტი აზერბაიჯანში საქართველოს ელჩის შეხვედრას კვლავ ელის.

მუსტაფაევას განცხადებით, Meydan TV-ის წინააღმდეგ გატარებულ ღონისძიებებს, აფგან მუხტარლის საქმეც დაემატა. ის დასძენს, რომ ჟურნალისტის ნახვის უფლება მხოლოდ მის ადვოკატს აქვს.

მუსტაფაევა წერს, რომ მუხტარლის ჯანმრთელობის მდგომარეობა კვლავ მძიმეა და მას სამედიცინო დახმარებას არ აძლევენ.

თბილისიდან 29 მაისს გაუჩინარებული ჟურნალისტი, აფგან მუხტარლი, რომელიც მეორე დღეს ბაქოს ციხეში აღმოჩნდა, ამბობს, რომ ის საქართველოს დედაქალაქიდან კრიმინალური პოლიციის ფორმიანმა პირებმა გაიტაცეს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს და მას უკვე შეეფარდა სამთვიანი წინასწარი პატიმრობა.

აზერბაიჯანში, ნასიმის რაიონულმა სასამართლომ, დაკავებულ ჟურნალისტს, აფგან მუხტარლის შინაპატიმრობაზე უარი 21 ივნისსაც უთხრა.

Meydan Tv აზერბაიჯანულენოვანი მედიასაშუალებაა, რომელიც გერმანიაში დაფუძნდა. Meydan Tv ალიევის ხელისუფლების მიმართ კრიტიკულადაა განწყობილი და აქტიურად აშუქებს აზერბაიჯანში სახელისუფლებო კორუფციის საკითხებს. აღნიშნული მედიასაშუალების ჟურნალისტები აზერბაიჯანში არაერთხელ გამხდარან დევნის ობიექტები.