ყოველდღიურად ჩვენ უამრავი გამაღიზიანებელი ხმა გვესმის — ქუჩაში მანქანების სიგნალიდან მეზობლის ჩაქუჩის გაბმულ კაკოფონიამდე. ზოგიერთ ხმას უნებლიეთ ვაიგნორებთ კიდეც, ზოგსაც, უბრალოდ, გავურბივართ. თუმცა, დანარჩენებს ვერსად დავემალებით. ამიტომ, დარწმუნებული ვარ, სამყაროდან მათ გაქრობას ყველანი უპირობოდ დავთანხმდებოდით.

1. მაღვიძარას ხმა

დილაობით, როცა ეს აუტანელი, მაგრამ, სამწუხაროდ, საჭირო ნივთი/ფუნქცია რეკავს, ყველა ჩვენგანი მზად არის, სამყაროს ყველაზე შორეულ კუთხეში მოისროლოს ან პირდაპირ ჩაქუჩის ჩარტყმით დაადუმოს ხოლმე.

2. ტელეფონის რეკვის ხმა

შეიძლება ტელეფონოფობია სულაც არ გაწუხებდეს, მაგრამ მაშინ, როცა რეკვა გაბმულია, სამყაროში ყველაზე ნერვებმომშლელ ხმად იქცევა. ისე კი, საერთოდ ტელეფონზე დარეკვის ფუნქციაც რომ გაგვეუქმებინა, ინტროვერტები მადლობლები ვიქნებოდით...

3. კარზე კაკუნის ხმა

მნიშვნელობა არ აქვს, გაზის დავალიანების გაგება უნდათ თუ ჭეშმარიტებაზე გასაუბრება, კარზე კაკუნი ყოველთვის უსიამოვნო განცდას აჩენს. რა თქმა უნდა, არა იმ გამონაკლის შემთხვევაში, როცა შეკვეთილი საჭმელი მოაქვთ.

4. მანქანების გაბმული სიგნალის ხმა

მაღვიძარასი არ იყოს, მანქანის სიგნალსაც ფრიად პრაქტიკული დანიშნულება აქვს, მაგრამ არცთუ იშვიათად მძღოლები ამ ხმას უმიზნოდ, მხოლოდ უახლოეს პერიმეტრზე მყოფი ადამიანების გასაღიზიანებლად თუ იყენებენ.

5. ღილაკიანი კალმის წკაპუნის ხმა

ამ ხმაზე მხოლოდ მასწავლებლები როდი ღიზიანდებიან — როცა გამოცდაზე ზიხარ, ტესტზე კონცენტრირებას ცდილობ და შენი გაგჭირვებია, ამ დროს კი ვიღაც შეუსვენებლად აწკაპუნებს კალამს, ერთიმეორეზე საშინელ აზრებს ვერ დაუძვრები...

6. თეფშზე დანის/ჩანგლის გასმის ხმა

მოდით, ფეხზე წამოვუდგეთ ყველა იმ საჭმელს, რომლის მირთმევაც დანა-ჩანგალს არ საჭიროებს. ხაჭაპურო, ლობიანო — გაფასებთ!

7. წვნიანის ან სასმლის ხრუპვის ხმა

აი, თუკი ამას უკვე ენის წკლაპუნიც მოსდევს, ნამდვილი ჯოჯოხეთია.

8. მეზობლის რემონტის ხმა

მაღვიძარას აუტანლობას არაფრით ჩამოუვარდება ბურღის ხმა, რომელიც დილაობით იმავე ფუნქციას ითავსებს ხოლმე. გაღვიძებას რა უჭირს, თუ "ისვენებ" და მთელი დღე სახლში ხარ, ნაშუადღევისთვის თავის ტკივილი გარანტირებულია!

9. (ზედა) მეზობლის ბრაგაბრუგის ხმა

შეიძლება კარგი, ანუ უხმაურო მეზობლებიც არსებობენ, მაგრამ ამ კატეგორიაში ძალიან ცოტა ზედა მეზობელი თუ გავა. ნაშუაღამევს თუ მაცივრიდან ქვაბი არ გადმოუვარდა, დივანი იატაკზე არ გაახოხიალა და ცეკვის რეპეტიცია არ დაიწყო, რაა მეზობლობა?!

10. დაბოლოს — ხვრინვის ხმა

უკომენტაროდ.