საქართველოს ბანკის მხარდაჭერით გამართული აქსელერაციის პროგრამა 500 Georgia-ს დემო დღის ღონისძიებაზე სტარტაპების მეხუთე ნაკადისთვის რეგისტრაცია გახსნილად გამოცხადდა.

დღეიდან ქართველ და უცხოელ სტარტაპერებს აქსელერაციის პროგრამაში მონაწილეობის მისაღებად განაცხადების შეტანა უკვე შეუძლიათ. ამისთვის, საკმარისია გადახვიდეთ ბმულზე - https://500.co/accelerators/500-georgia/apply, ან ქვემოთ ნაჩვენები QR კოდი დაასკანეროთ:

ფოტო: საქართველოს ბანკი

დემო დღის ღონისძიებაზე საზოგადოების წინაშე 12 კომპანიის წარმომადგენელი უკვე წარდგა. მათ ინვესტორებს თავიანთი პროდუქტები, უპირატესობები და შეთავაზებები გააცნეს. ესენია მეოთხე ნაკადის 12 სტარტაპი 7 სხვადასხვა ქვეყნიდან, მათ შორის საქართველოდან: Arena Games, Bilimber, DataMind, Dealpad, Deskntea, Emonomy, Fortu Wealth, Glorri, Murmur, OneApp, Squares, და Uteach.

აქვე გეტყვით, რომ 500 Georgia აქსელერაციის რეგიონული საინვესტიციო პროგრამაა, რომელიც სილიკონ ველიზე დაფუძნებული 500 Global-ის, საქართველოს ინოვაციებისა და ტექნოლოგიების სააგენტოსა (GITA) და საქართველოს ბანკის პარტნიორობის ფარგლებში შეიქმნა.

მისი განხორციელებით 500 Global მიზნად ისახავს, საერთაშორისო ცოდნისა და რესურსის გამოყენებით სტარტაპებს საუკეთესო გამოცდილება შესთავაზოს. უფრო ზუსტად, კაპიტალით უზრუნველყოს ისინი, ხელი შეუწყოს გლობალურ ბაზარზე გაფართოებაში და, საერთო ჯამში, საქართველოს სტარტაპ ეკოსისტემა გააძლიეროს.

პროგრამაში მონაწილეობა სტარტაპებს საშუალებას აძლევს, მენტორებისა და ინვესტორების ფართო აუდიტორიას მისწვდნენ, ამ გზით კი საკუთარი პოტენციალი მაქსიმუმამდე გაზარდონ. ასევე, უცხოური ბაზრები შეისწავლონ და საკუთარ კომერციულ შესაძლებლობებში უკეთ გაერკვნენ.

რაც შეეხება 500 Global-ს, იგი ე.წ. ვენჩურული კაპიტალის კომპანიაა, რომელიც 2.7-მილიარდიან აქტივებს მართავს. იგი ინვესტიციებს დებს სტარტაპებში, რომელთაც პოტენციალი აქვთ, სწრაფად მზარდი ტექნოლოგიური კომპანიები გახდნენ; თანამშრომლობს ეკოსისტემის მთავარ მონაწილეებთან და მთავრობებს ისეთი სამეწარმეო ეკოსისტემის შექმნაში ეხმარება, რომელშიც სტარტაპები სწრაფად შეძლებენ განვითარებას.